تجرك الخطوة على دروب الاسفار

تجرك الخطوة على دروب الاسفار
وتعصف بك رياح الدهر والنوايب
هذي تصاريف الليالي والاقدار
تمسي غريب وتبتعد عن حبايب
وحيد حار الدرب في وجهتك حار
غريب وصروف الليالي غرايب
ياليل مالي في دجا ظلمتك نار
أضوي بها درب مشته الركايب
سافرت ودموعي على الخد مدرار
والقلب من حر التناهيد ذايب
ودعت ربع كنهم بيض الاقمار
فارقتهم من دون ذنب وسبايب
ما خنتهم بس الزمن كان غدار
وش للزمن يرمي علي المصايب
دارت رحا الفرقا ودار الزمن دار
وسوت بي احداث الزمان العجايب
في كل أرض رحت دقيت مسمار
ويعود مسماري عن الأرض نايب
يا رحلة الغربة غدى العمر مشوار
أستسمحك يادرب لوعدت خايب
مليت من ضوضا المدينه والأنوار
وفوضى الشوارع والسفر والحقايب
زرعت في صدري من همومي اشجار
واسقيتها بدموع عين صبايب
وتعبت أدور لي عذر مالي أعذار
ماكنت انا مخطي ولا كنت صايب
أسامر نجوم الليالي بالأسحار
وحيد حتى البدر ياليل غايب
ما ينشرح صدري على شبة النار
في خبت أجرد كل مافيه هايب
وأنا الذي داري تمارى بالأنظار
فوق الجبال النايفات الذرايب
هناك لي صحب وحبايب وسمار
وهناك ربعي والأهل والقرايب
وهناك عشق لليالي والأشعار
ما أتوب عنه لو غدى الراس شايب
جلسة سمر مع دندنة عود وأوتار
وتمر حولي ساريات السحايب
وأغصان تترنح تقل فيهم اسكار
مثل الذهب لون الغصون الذهايب
تذكار ياذيك السواليف تذكار
لا من ذكرتك عود القلب ذايب
في ذمتك يا قلب ما اشتقت للدار
ويا عين ما اشتقتي لشوف الحبايب
يا صاحبي في داخلي سور ينهار
ان مرت الذكرى مرور الهبايب
ياهيبة الذكرى على قلب مغوار
لا تشعلي خوف وماني بهايب
أدري همومي جم وذنوبي اكثار
وأدري على مثلي تنوب النوايب
وأدري بعد ربي عزيز وغفار
عودت لك يارب يارب تايب

الموضوع الأصلي: تجرك الخطوة على دروب الاسفار || الكاتب: اسيرالحنان || المصدر:

https://www.dm3twlh.com/vb/

المصدر: منتدى دمعـــة ولـــه - من قسم: الشعر وعذب الكلام- Poetry Section

---

j[v; hgo',m ugn ]v,f hghsthv

منتدى دمعـــة ولـــه - الشعر وعذب الكلام- Poetry Section

---

j[v; hgo',m ugn ]v,f hghsthv