زامر الحي

السلام عليكم ورحمة الله وبركاته
إخواني أعضاء هذا المنتدى الغالي يسعدني ويشرفني
أن أقدم لكم هذه القصيدة التي تفجرت بها قريحتي وهطلت علي
بدون سابق إنذار وتوالت الأبيات هي لكم كما خرجت
ولكم معها الود والورد

بحّيت صوتك كف يازامر الحي = ما أحدٍ بيطرب لو فنيت المزامير
لحنك حزين ونبرتك مابها غي = وصوتك تسلطن لا نشازٍ وتكسير
تخاطب الإحساس ما تخاطب يدي = وهذا زمن صيحة وصفقة وتصفير
غيرك مدح من يوصفه حاتم االطي = وبنى من أفعال الردي الأساطير
وأنتا تخيط الجرح وتعالج الكي = وترقص بصوتك حمام وعصافير
إلا متى ياصاحبي تحترق ضي = والمجد للي يسرق الضي وينير
وإلا متى ياصاحبي تندفق مي = والناس تاخذ للسراب المشاوير
وإلا متى ياصاحبي تنتظر ري = وكل ما استقيت المزن تهطل أعاصير
إلا متى إلى متى قول ياخي = طيور طارت بالرزق أصح يا طير
وين الإجابة انتظر قولها لي = مليت من قولتك : ياخي أنا غير
نافق وجامل وأدّعي وهايط شوي = وإن مامشت مالك سوى دهنة السير
لا تمدح الرجال لو مامعه شي = لو به كرم حاتم وبه نخوة الزير
أمدح كثير المال مدفون أو حي = إن ماجنيت الفود مابه مخاسير
كل لحم أخوك المسلم وأنهشه ني = ولا تقرّب صوب لحم الخنازير
ولو كنت ما تضيّف ضيوفك على طلي = ذبايحك يشهد عليها الجزازير
أكشخ تغنج بالدلع غير الزي = ولا ينفع الحلاق شفلك كوافير
لا تدعم الناجح وإذا صافحك عي = وازرع إذا تقدر بدربه مسامير
ياصاحبي الزمار مابك ترى بي = لا تستحي واحنا غدينا مخاشير
تبغى تعرف اش فيك وتعرف وش في = السالفة "شلة" توجه جماهير
يالله مشينا نترك الدار والحي = يمكن نلاقي عند الأجناب تقدير

وسلامتكم

أخوكم عبد الرحمن بن سعد الضحيان
حزين الحرف

الموضوع الأصلي: زامر الحي || الكاتب: حزين الحرف || المصدر:

https://www.dm3twlh.com/vb/

المصدر: منتدى دمعـــة ولـــه - من قسم: الشعر وعذب الكلام- Poetry Section

---

.hlv hgpd

منتدى دمعـــة ولـــه - الشعر وعذب الكلام- Poetry Section

---

.hlv hgpd