المال عايق للضعوف المسـاكين
.........................كم من ضعيفٍ حاجته ماوجدهـا

دونه يحول الفقر ياهل الملايين
........................وتصـعب عليه اللقمه اللي فقــدهـا

لوهو يبي ستره عن الربع الادنين
.............................تحــده العـازه لنــاسٍ هجــدهــا

وتاقف ظروف الوقت دون الملبين
............................ويعيش ذل الفقر باليوم الادهــا

وسعادة ابن آدم الى من لقا اللين
.............................غير الحياه اللي بفقره وردهــا

ويموت وهو واقف له بموقفٍ شين
...........................من زود صكات الليال ولـهـدها

ويخفي عن اقرب ناس عنده سهرعين
...........................من لوعةٍ باقصى الضماير نكدها

يطيح حي ولانصوه المواسـين
...........................ماغير شوف عيون قـلل سـعدهـا

والا على الكوره تكب المــلايـن
..........................وجوعا البلد زود الغلا يضطهدها

وتفاخروا اهل النوادي على وين؟!!
............................وكلٍ يميــنـه للـنــوادي فــردهـــا

والا ضعوف الخلق دارت بها سنين
..........................وغبر السنين امحت عليها سـعدها

وباكر الى جا تسليم كتب الميامين
.........................اهـل الشــمال بكتـبـها تـنـتـقــدهـــا

اول ســؤال يواجهه باللقا وين؟!!
.........................مــالـك بــذلـتـه بالحــيـاه وبـردهــا

وخصمه فقيرٍ حده الغبن والبين
........................ لـقـمة عشــاه بجـوعتـه ماوجــدهـا

ياويلكم من كل جايع ومسكين
........................يازمـرةٍ غـفـلت عـن اضُـعفْ بلـدهـا

ماينفع محامي ولاقاضيٍ شين
.......................يلـيــن بالجـانـب الى شــاف الادهــا

حكمكم اللي عادلٍ بالقوانين
.........................اصـغارهـا وكبـارهــا كـد جـردهــا



وكلٍ كتابه معه ماله معدين
........................ماعـديـت حتى الصغاير رصــدهــا