فمـان الله يـا لولـو بحـر ماجابـه الغـطـاس
فمان الله يـا أطهـر وأبيـض ( قلـب ) حبّيتـه
فمـان الله فـي دنيـاً سعيـده كلّهـا أونــاس
هـذاك الـدرب ينتظـرك وانـا دربـي تنصّيتـه
نهايـة دربنـا بـاب ٍ تكاثـر عنـده الـحـرّاس
نهايـة دربنـا لغـز ٍ رمعتـه لـكـن أخطيـتـه
نهاية طيب .. في صفحة وفا .. وخْتامها نوماس !
وأدوّن قصه تجمعنا بـكتـاب (الصـدق) سمّيتـه
صحيح أستأذنك صعبه !! ولكن يالغضـي لابـاس
خيالك داخل أعماقـي رسـخ مـن يـوم خطّيتـه
وانا يوم أجرع الفرقا ورضيت آعانق الهوجـاس
وخاويـت السهـر والنـوم هاجرتـه وجافيتـه :
عشانك يابعد عمري .. عشانك يابعـد هالنـاس !
عشانـك يابعـد حـي الشمـاااال ويابعـد ميتـه
فديتك زهرةٍ فاحت وفـا .. وإستنعـش النسنـاس
فديتك مهرةٍ شوفه شفا .. وش عـاد لـو جيتـه
فديت الجمرتين اللـي يحرسـن لمعـة الألمـاس
فديـت الوجنتيـن و لمعـة الديجـور مـع ليتـه
فديت الطول مع خصـر ٍ تمايـل ظامـر ٍ ميّـاس
فديت الزول لو بوْصف تعبت أوصف ولا أوفيتـه
فديـت الشامـه ورمـشٍ كحيـل وناظـرٍ نعّـاس
وشعـر ٍ ضاعـن يدينـي بظلامـه يـوم فلّيتـه
فديتـك كلـك وكلـي قصيـدٍ يرهـق القرطـاس
فديتـك كلـك وكلـي مشاعـر لكـن أزريـتـه
أجل وشلون أترجم لك مشاعر مالهـا مقيـاس ؟
وشاعـر جامـع ٍ هـم الليالـي فـي تناهيـتـه
وأنا ! لامن عشقت أعشق على وضح النقا نبراس
بْدوي ٍ لاسمع طاري الخيانـه ينتخـي بْـصيتـه
ياليتك طيف في بالي تلاشـى بحضـرة الجـلاس
وقلبك ماعـرف قلبـي يـا قلبـي آآآآآآه ياليتـه
زمن قاسي .. بشر أقسى .. قلوبٍ مابها إحسـاس
زمن حلّل قتـل طفلـه وطفـل ٍ لاهـي فْ بيتـه
زمن فيه الوفـا كلمـه تخـط بأبيـض الكـرّاس
زمـن لـو نـزّل دموعـي يسمعنـي زغاريتـه
حياتـي دامهـا شـادت بجوفـي مملكـه لليـاس
أبي تقـريْ نهايـة درب علـى شانـك تخطّيتـه
خلاص أستسمحك برحل كما حر ٍ كفـخ قرنـاس
نصيـت الـدار يـوم الـدار نادى لـي ولبيتـه
بقالك كلمتين ٍ تحتهـن خـط ومابيـن أقـواس:
( فمان الحب ) يا أطهر وأصدق قلـب حبّيتـه !!