مسلسل ( تعبت أشكــــــي)..

تابع الحلقه الاخيرهـ



نزلت ساره البيت وطلعت وأنا حدي معصب..
أجل أنا ماتبي تشوفيني..!!
مالت عليها..!!
يعني أنا اللي ميت عليها..!!
وشفيها يعني اذا شفتها وهي بالحال ..بتموت يعني..!!
والا بتجيها جلطه..!!
هي لو تدري شكثر أنا مشتاق لها..!!
كان خلتني متصنم عندها لبكره..!!
بس هي شعليها..!!
أنا اللي أحترق ..وهي صايره زي الثلاجه..!!
أنا لو خذتها.والله لكسر راسها بسببت دلعها الماصخ..!!
.
.
أجل أنا..
أنا..
خـــــالــــــــــد
ماتبي تشوفيني..!!







وشفيها يعني..!!شغله شريفه وبتكسبنا فلوس..!!
ام حنين\بس ياولدي..أنت داخل على ثانويه عامه..ولازم ماتفكر الا بدراستك..!!
عمر\يمه ارجوك ماأظن هالشغله بتلهيني عن دراستي..وبعدين انا عارف مصلحتي زين..!!
حنين\عمر..كلام أمي صح..وان شاء الله اذا تخرجت سو اللي تبيه بس اللحين ياأخوي التزم بدراستك أحسن لك..
عمر\وبعدين يعني لين متى بفهمكم أني أبي أعتمد على نفسي..والا انتوا عاجبكم هالحاله اللي نعيشها..!!
أصحوا شوي..
أحنا كل مره ونرجع لورى..
واليوم غير عن أمس..!!
أم حنين\ونسيت..!
عمر\نسيت شنوأ...!!
أم حنين\نسيت وصية ابوك لك..!!
عمر \أبوي..
أم حنين\أيه أبوك..والا حتى ابوك نسيته..!!
مارد عمر ولا أمه وطلع بره الغرفه ومن الغرفه لبره المستشفى بكبرها
وهي تنعاد كلمات أبوه براسه كل مره..
(وعمر...وعمر قوله يتخرج ويجيب أحسن العلامات ويتوظف ويرفع راس أمه..قوله اني أحبه..قوله يسامحني..
قوله يسامحني... )
عمر\لايايبه ..لا..انا لازم أرفع راسك..!!
بس شلون ...!!
شلون ياربي..!!



لافي ..مع السلامه..

لافي\العنود ..ليش..!!
العنود\شنوا ..اللي ليش...أنت من صجك..!!
لافي\أيه من صجي...يا عنود..حسي فيني...!!وأنا أبي نتزوج ونسافر ..البعثه مابقى لها شي..
العنود وتناظر الباب\لافي أرجوك..مقدر أكلمك أخاف احد يدخل علي...
لافي\مستحيييييييييل..مستحييييييييييييل اسكر قبل ماأعرف رأيك..
العنود وأنهارت\شتبيني أقول!!
لافي وهو هيمان\قولي كلمه من أربع حروف..
العنود\لافـــــــــي..
لافي\أنا تعبان ياعنود حرام عليك حسي فيني...
لافي\أسمعي عنود..بكره بكلم خالتي عن موضوعنا وبقول لها عن السفر..وماعندي غير هالكلام..سلام..
وقفل بدون مايسمع ردها
..وهو ينتظر بكره عشان يحسم الموضوع..

العنود رمت نفسها على السرير..
وجلست تفكر بتصرف لافي المتهور
أولها كلمها بدون قيود..
وآخرها رمى عليها خبر هي مو قده..








بعد يومين من الأحداث السابقه..


طلعت من المخفر والجواز بأيدي..
والحمد لله لقوه بالوقت المناسب..
مافيني أقعد الصراحه اكثر..
أبي ارجع بسرعه عشان أشوفها..
وشكلها ماعرفت أني أنا اللي داق عليها..عشان كذه ماردت..
يالله خيره..
يمكن المقابله احسن من أني أسمع صوتها...
الله كريم..
رجعت الفندق وجهزت أغراضي كلها
وطلعت للرسيبشن عشان ادفع باقي الفلوس..
وبكذه أنتهيت وكلها نص ساعه وارجع ديرتي...
وكل ماأتذكر أني بصير أبو..أطير من الوناسه..
يارب شقد أنت كريم..!!
وأحنا اللي مبتعدين عن رحمتك..!!
من أول ماتركتني حنين..
وأنا أتخذت قرار أني لازم أبتعد عن كل شي يذكرني فيها..
واللحين بعد ماسمعت الخبر..
مشيت اهرول لها ونسيت كل شي صار بينا..
لكن الله يستر ..
اخاف أنها ماتتقبلني..
وتتذكر كل اللي صار..
أو أنها تصير جامده..وماتحس فيني..
وأطلع من عندها مثل كل مره جيت فيها لها...
يارب ..ساعدني
لازم أرجع حنين لي..
لازم.
ركبت سيارتي وأنا أتذكر اخر مقابله بيني وبين لينا..
كانت مقابلة تصفية حسيبات قديمه
وشفت الحزن بعيون لينا لأني قلت لها عن حمل حنين..
لكنها لازم تعرف أني مستحيل أرجع لها ثانيه
وطول هالمده اللي جلست فيها كانت هروب بالنسبه لي..
ومردي برجع لها..
ومره ثانيه حسيت بجرحها ..لكني مش قادر أسوي شي..
وتمنيت اني أبدا ماأتعرض لهاالموقف السخيف لكن..
الله كتب انا نتقابل..وتقابلنا..
لكن الحمد لله أنتهينا بتصالح أبدي ..
وتفارقنا ..

لكن مع ذلك أنبني ضميري على خيانتي لزوجتي....
لأن حتى لوكان لقائنا عادي بس المفروض اني ماأخون .
على أنا كل لقائتنا كان محور حديثنا عن حنين ..
بس ولو هذا مو عذر..
لأني لو كنت أنا بدال حنين أكيد بنهار وبقلبها حريقه بعد..
بس في شعور بداخلي يقول ..
هي اللي أبتعدت عنك..وماتبيك.وتكرهك..
أتركها وخلها في طريقها..أريح لها..
لكن في شعور يمنعني وصار اقوى يقول
خلاص يافيصل..
لاتفكر باللي فات..
أنسى لينا..
وأفتح صفحه جديده ..
وتذكر حنين وحبك لها..
والمولود اللي جاي بالطريق..

وبكذه حاولت أنسى وأركز على حياتي مع حنين..


يتبع,,,




أحساس

يسلموو خيتو احساس

قصة رائعه كل حلقه احسن من اللي قبلها تسلم اناملكــ خيتو

ننتظركـــــــ

تابع الحلقه الاخيرهـ



يمه ترى مليت..
أم حنين\خلاص يابنتي هانت وبكره بتطلعين..بس تصدقين الحمدلله ,..صحتك صارت احسن من قبل..
حنين\أي صحه يايمه..لولا الله ثم هالمغذي اللي حاطينه لي..كان صارت علوم..
أم حنين \بس لحد اللحين مارجعتي مثل أول الهلات مغطيه على وجهك..يابنتي أرتاحي ونامي لاتفكرين بشي..
حنين \الله كريم ..يمه
ام حنين\نعم يابنتي..
حنين\أنا قلت لــ العنود تدق على طالبه كنت أدرسها ومادفعت فلوس الماده..
أم حنين\ليكون مريم..اللي قلتي لي عنها..
حنين\أيه
أم حنين\بس يابنتي هذه ظروفها صعبه..
حنين\يعني أحنا اللي ظروفنا سهله..وبعدين لاتخافين صار للبنت اكثر من ثلاث شهور وأكيد قدرت تدبر المبلغ..
أم حنين\والله مدري شقولك..
حنين\لاتقولين ولاشي..واذا طلعت أنا الله بيسهلها أن شاء الله..
أم حنين\انتي لحد اللحين مصره..!!
حنين\ومستحيل اتخلى عن قراري مهما صار..
ام حنين وعشان تغير الموضوع\كأن عمر تأخر..ليكون صار له شي..
حنين\مسافة الطريق وجاي..

فيصـــــــــل..
فيصل\هلا يمه..وحب راسها وحضنها..وحشتيني..وحشتيني كثير..
أم فيصل دمعت عيونها فرح\وينك ياولدي ..حرام عليك..كل هالمده تاركنا ولا تسال عنا..لهدرجه قلبك صار قاسي علينا..!!
فيصل\آسف يمه..آسف أعذريني .انا أدري أنا مقصر..بس الله يعلم بحالي..
أم فيصل \لاتحاول يافيصل..شهرين وأنا مدري عنك..لهدرجه هنت عليك..!!
لهدرجه صرت رخيصه عندك..!!
فيصل بلوم شديد\آسفه..آسف ياغلى أم آسف..وحب أيدها..أوعدك ماأعيدها بس أرضي علي ارجوك..
أم فيصل\قلبي راضي عليك ..مهما قسيت وأبتعدت..
سمعت ساره صوت أخوها وعلى طول جات الصاله
ساره\فيصـــــــل..توه مانور البيت ..وركضت تسلم عليه..
فيصل\هلا ساره..شلونك ..!!
ساره ودمعت عيونها\اللحين أحنا بخير..وأخيرا رضيت علينا وجييت..
فيصل\أهم شي تكونون راضين علي قبل..
أم فيصل\أجلس ياولدي..تعال..شسويت طول هالمده..!!وليش ماقمت ترد علينا ..!!

فيصل\يمه سالفه طوييييييييييييله..بعدين اقولكم أياها..بس اللحين علموني ..حنين بأي مستشفى...؟؟!






جلست لحالي زي كل مره أهلي يطلعون فيها
جلست لوحدي وأفكر بالسالفه اللي أتظاهر للناس أني مش مهتمه فيها..
الكل يفكر اني متجاهله موضوع حملي ..
وهو مايدرون أنه هالشي كبير بالنسبه لي..
وخصوصا أنه قلب كل شي كنت أفكر فيه..
وبديت أراجع حساباتي من اول وجديد..
..
وبالنهايه رجعت مثل مابديت..
بدون هـــــــــدف



نزلت من السياره وانا قلبي تنسمع دقاته..
تلخبطت مشاعري بين شوق ولهفه ومراره..
ياترى كيف بتقابليني ياحنين.!!
ليتك تسامحيني على غلطاتي وتبتدين صفحه جديده مثل مابديت..
ليتك ترحميني وتحسين فيني..
آآآه ياحنين ..
وش سويتي فيني..!!

دخلت السمتشفى وأنا مرتبك..هذا غير الأرتجاف اللي يحتويني..
سالت عن رقم الغرفه
وطلعت لها..
وأول مادخلت الغرفه
كانت مظلمه ومافي غير أضاءة السرير..
وشفتها
.
.
وعلى طول رف قلبي على منظرها اللي يقطع القلب..
كان شكلها تعبان ووجها أصفر وهذا غير الهالات اللي بعيونها.
ياحبيبتي ياحنين..
ليت اللي فيني فيك..

وبصوت واطي همست لها على أمل أنها تصحى
فيصل\حنين..
وعلى طول فتحت عيونها..
شكلها ماكانت نايمه..
بس مغمضه عيونها..
حنين\فيصــــــــل..!!
فيصل\ايه فيصل وجلست جنبها على السرير..
فيصل\الحمد لله على السلامه..
حنين وهي لحد اللحين متفاجئه وماتوقعت زيارته\الله يسلمك..
فيصل وفرح برد حنين\حنين..مبرووك علينا أحنا الأثنين ..
حنين \الله يبارك فيك..فيصل..
فيصل\هلا..
حنين\فيصل..أنت فيصل..!!
فيصل\ايه فيصل.شفيك حنين..لحظه..(وشغل اللمبه..(تأكدتي أني فيصل..
حنين\أيه..
فيصل بابتسامه حزينه\وحشتيني..
نزلت حنين عيونها وماعرفت شترد عليها ...
كل الكلام اللي كانت بتقول له تبخر من أول ماشافته..
وماتري ليه كانت تبي تقول حتى انت وحشتني أكثر..
ماتدري ليه ..كانت تبي تضمه وتصيح في حضنه..
وتقوله ..معقوله هنت عليك كل هالمده..
معقوله ماصدقت على الله وابتعدت بأول موقف..
معقوله خذلتني ..وخذلت نفسك..وماقدرت تتحمل المسؤليه..
كلام كثييييييير في قلبها وتبي تفرغه قبل ماتنفجر..
لكن مثل كل مره..
دايم يخونها التعبير..
وهي في عظم حزنها..
وبالأخير..
نزلت دمعه من عيونها ..
وهالدمعه ممكن أنها تكون جواب لــ فيصل الغايب..
فيصل \ليش..!!ليش الدموع..حنين..يابعد هلي..تكلمي..لاتمين ساكته..ترى مافرقنا الا سكوتك.. صدقيني أنتي تذبحيني بسكوتك ..
حنين\ايش تبيني أقول..وأيش تبيني أسوي.. تبيني أقابلك بالأحضان وأقول ونعم الزوج اللي يفارق زوجته وهي أمس الحاجه له.. والا تبيني أضحك وامشي الموضوع بسهوله..
خلني يافيصل ساكته..
خلني ساكته أحسن لي ولك..

فيصل هنا تضايق أكثر واكثر..حنين أستفزته بكلامها..وحس أنه هالكلام جرح على قلبه ..
ماقدر يستحمل..وقال كل اللي بقلبه

فيصل\لا ياحنين ..هذا مو حل .... أسألي نفسك ليه أنا أبتعدت قبل ماتسأليني..
أنا كل مره أحاول أتقرب منك وانتي تبتعدين أكثر واكثر..
وكل ماأجي أزورك تصديني وتتمين ساكته سرحانه وانا المغفل اللي ينطم ويسكت..
وكل مره على هالحاله..لمن تعبت..

صدقيني تعبت نفسيا..
ماقدرت أشوفك وانتي بهالحال وأنا مكتف الأيدين ..مش عارف كيف اطلعك من حزنك..
صدقيني تعذبت عشانك وأنتي مش حاسه فيني ولا حاسه بوجودي أصلا..
كنت أطلع وادخل وأنتي ماتدرين عني..
عشان كذه ابتعدت..
يمكن البعد يحننن قلبك علي..
لكن صدقيني وحتى وانا مبتعد عنك كنت أتعذب لفرقاك
كنت اتمنى أرجع وأشوفك..
لكن شالفايده مدام انك على حالك..
كنت أسأل خواتي عنك..
وهو يجيبون اخبارك ..
وكل مره قلبي يتقطع لمن اعرف أنك على حالك ماتغيرتي..

وبعدها لمن جابوا لي خبرحملك..
طرت من الفرحه ساعتها..
حسيت أني مجنون من الوناسه..
وعلى طول بعدها جيت اركض لك..
جيت اطلب سماحك حتى لو مابرأت جروحي..
...
حنين.. (ومسك أيدها..(
سامحيني..كلنا غلطنا..
ولازم نتحمل نتيجة أغلاطنا..
أرجوك سامحيني..
أنا حياتي من دونك مستحيله..
أرجوك ارجعي لي...

أنا بتركك تفكرين على راحتك..
واذا توصلتي لحل ..
بتشوفيني بنفس المكان اللي طلعتي منه..
بس تذكري شي واحد

أنا محتاج لك..وانتي محتاجه لي..


ماردت عليه حنين ولفت وجهها عنه..
وهو فكر أنه حنين بالحركه رافضته..
وطلع من عندها..
وركب سيارته..
"أعذريني ..ولو غلطت صعبه يعني تعذريني..
.....................................


جاء يوم ثاني...
وطلعت حنين من المستشفى وراحت لبيت اهلها
وفيصل درى ..وتضايق كثير..بس صبر نفسه وعرف أنها لسى ماأتخذت قرارها



يتبع,,,


أحساس

تابع الحلقه الاخيرهـ





أم حنين\ها ..وش قلتي.!!
العنود\ بس يايمه انتي تعرفين ظروفنا عدل وأنا اذا وافقت ورحت معاه بصير أنانيه في حقكم..
أم حنين\ياحبيبتي انتي لاتشيلين همنا..والله سبحانه ماينسى عباده..ولاتخافين ماأحنا ميتين جوع..وفكري بنفسك شوي..وبعدين أنا ورحت..وحنين بعد بترد تدرس وكل شي بيتصلح..
العنود بضيق\ولو ..ماأقدر..مأقدر..عن اذنك يمه..
أم حنين\الله يهديك ياعنود..أنا لازم اكلم حنين..
.
.
حنين\من صجها هذه..!!
أم حنين\والمشكله أني متفشله من خالك شقوله...ياحنين تكفين كلمي أختك..تراهي مصممه على رايها..
حنين مسكت ايد أمها\لا تخافين يايمه..بكلمها اللحين وان شاء الله توافق..
أم حنين\يارب..
وراحت حنين لعند أختها بالغرفه..وشافتها جالسه على السرير ومغمضه عيونها..
قربت منها وجلست جنبها ..
حنين\العنود..
حنين\العنود..أختي الصغيرونه..
العنود ومغمضه عيونها\حنين..ترى مالي خلق أبي أنام..
حنين بابتسامه\أفا...اللحين انا أجيك وأتواضع وتطريديني من غرفتي..!!مايصير..قومي يالله..وسحبت الفراش..
العنود\أوووه...حنين.وبعدين قلت لك خليني أنام...بليز اذا تبين تجلسين اسكتي ..
حنين\طيب يالعنود..مشكوره على كلامك ويجي منك أكثر..أنا بطلع..وقامت..وتوها بتمشي الا مسكتها العنود من ايدها..
العنود وهي تصيح\آسفه حنين ..لاتزعلين..بس أنا متضايقه شوي..
حنين سمعت صوت أختها وتأثرت..لهدرجه اختها مش وافقه..
تساؤلات كثير جات في بالها..
وماحست نفسها الا وهي جالسه وتمسح على راس أختها..
حنين\عنود..فيك شي...!!لافي سوى لك شي..تكلمي..!!
العنود عدلت جلستها وتكلمت\لا ياحنين؟؟لافي ماسوى شي..
لكن انا..أنا
حنين\أنت أيش..؟؟
العنود\أنا مااقدر أتركم لوحدكم..وخصوصا بهالأوقات..
أنت عارفه ليش طبعا...!!
صدقيني فكرت كثير ..لكن ماتوصلت لحل..
ولافي ملزم علي أنا نتزوج..
أنا ماألومه..
صار لنا شهور وأحنا مخطوبين..
وهو صابر..وانا بعد صابره..
لكن ماأقدر..مااقدر أتركم واسافر..
مأقدر أبتعد عنكم..
لأني ماتعودت على البعد..
وبالنفس الوقت ودي أريح لافي وأرتاح..
بس ماباليد حيله..
وهو اللحين بدون مايعرف اني رافضه زعلان..
أجل كيف لو عرف..!!
أنا أحبه وماأبي أخسره..
لكن مش قادر اتخذ قرار..
احس أني تعبانه..منهاره..
حنين بحزن فضيع\ياحبيبتي ياعنود...أحنا وين رحنا..أنا الحمد لله برجع أدرس وامي نفس الشي تبيع اللي تقدر عليه..وربك كريم ماينسى عباده. .وهذه حياتك..لين متى بتظلون مخطوبين..الولد معاه حق..
وهو بعد مايقدر يترك بعثته..
وبنفس الوقت يبيك تكونين معاه بغربته..
واذا أنتي متضايقه عشانا ..لاتخافين..
ربك بيفتحها..
أهم شي انتي ترتاحين..
وغير كذه أنتوا مش ظالين طول عمركم مسافرين كلها كم شهر وبترجعون..
وبترجعين تشتغلين وتساعدينا..
العنود\بس ياحنين أفهميني..؟؟
حنين\ايش تبيني أفهم..خلاص مافي مشكله صارت عندك..وانت لاتعقدين الأمور أكثر..سهليها والله بيفرجها..
العنود\يعني هذا رأيك..!!
حنين\أيه هذا رأي..ويالله قومي غسلي وجهك أنتفخ من كثر الصياح..وأنا بروح ابشر أمي..
العنود\أن شاء الله..

قامت العنود تغسل وجهها وظلت حنين تفكر بكلام أختها..
هي معاها حق بكل اللي قالته ..وفلوس التدريس ماتكفي..
لكنها ماتقدر توقف في طريق اختها..!!
واذا على هالشهور اللي بتمر
جاتهم شهور أصعب وقدروا يتعايشون مع الوضع..
واللي الله كاتبه بيصير..بــ العنود او بدونها..

ومشت الأيام عاديه
مالها طعم..مالها حياه..
صارت روتينيه..
فيصل داوم بالشركه وخذ مسائي عشان يشغل نفسه بالشغل
ومايرد الا تالي الليل..
ويحاول انه يكلم حنين بالتليفون عشان يطمن على صحتها وصحت اللي في بطنها..
حنين رجعت للتدريس للي ماخذين دور ثاني ..وبنفس الوقت تلهي نفسها عشان ماتتخذ قرارها بظغوطات نفسيه..
العنود على نفس حالها تشتغل بالمشغل.. واذا طلعت منه تروح تروح السوق عشان تجهز لزواجها


يتبع,,,,



أحساس

تابع الحلقه الاخيرهـ




عمر مايحس أنه له هدف ..هو الوحيد منهم اللي ماقدر يتأقلم مع الجو ويحس نفسه ضايع وبحلقه مغلقه
الدنيا تدورفيه..وهو مش حاس بنفسه..أنعزل عن الكل ..حتى من خواته..والكآبه صارت عنوان حياته..

ترف وخالد ..على حالهم . لكن خالد لحد اللحين ماخذ على خاطره من ترف لأنهامارضت تشوفه وهو جايها المستشفى..وترف ماتدري شسالفه لأنها ماشافته من ذاك اليوم

سوزان..كبرت علاقتها مع يوسف ولحد اللحين محد كشفها على طلعاتها معه أما زياد حاط في باله أنه هذا الوقت المناسب عشان يتقدم لها ..وكلها مسألة وقت ويحسم الموضوع..


هيفاء تحررت اخيرا من المعصم اللي كابد في قلبها وفتحت صفحه جديده كلها تفاؤل..
وكانت خايفه انه علاقتها مع صديقتها تخترب لكن الحمد لله صديقتها تفهمت الموضوع لأنها تعرف مين اخوها مش حاس بمسؤلية زواجه..

متعب قدر يتعايش مع جو الزواج وحس بطعم المسؤليه وحلاوتها..وطبعا هالشي لازم يكون من الطرفين عشان ينجح الزواج..وبالفعل نجح..

ساره...أبتسمت للحياه مره ثانيه وطوت صفحة الحزن..ومتأمله خير لحياة حنين وفيصل..ودعت ربها أنه يردهم لبعض..

بعد مرور شهرين على الأحداث السابقه..


(3)

حنين\بطني ..بطني حسبي الله على بليسك..عنــوود ترى أنا صار له شي لأذبحك
العنود\شسوي لك يعني..انا ميته خوف وأنتي مبرده..شعري عدل والا..!!
حنين وهي تضحك\لا..مو عدل..
العنود وتناظر نفسها بالمرايه\سخيفه..والله سخيفه...وبعدين وخري عني أنتي ودبتك هذه..وينها ريموا..روحي ناديها الليله ملكتي...
ريم بصوت عالي\ها.ها شتبين..مصدقه نفسك أنك بتتزوجين يالعانس..اشوف شعرك..وععععععععععع ..أيش هذا..طايح..كأنك هنديه..الشي حلو بسيط ...لا هو ناعم..ولا هو خشن..مو طايح وعفست وجهها ..وعععععععع
العنود وشو يتصيح\مووتي حره..أصلا أنتي منقهره لأن شعري أحسن من شعرك..
حنين\أقول أنا بطلع بشوف المعازيم بره..
العنود\ريم..بلاه حركااات صبيانيه..تكفين شعري عدل والا لا..!!
ريم وفيها الظحكه\عنوود..شفيك..هذه ملكتك ,أذتينا..أجل اذا جاء بكره بعرسك شو بتسوين..!!
العنود\بمووووووووووت..أحس أني خايفه..وأنتي تخوفيني زياده..
ريم\ليه..عوعو على غفله..؟؟
العنود\لا..نونو..


ساره\شخبارك..!!
حنين\الحمدلله..أنتوا شمسوين..!!
ساره\كلنا بخير.ونننتظرك..
حنين\طيب..ساره..أنا آسفه..
ساره\آسفه على شنوا..!!؟
حنين\آسفه وبس..
ساره\كيف بس..؟
حنين\على الكلام اللي قلته لك يوم كنت بالمستشفى..بس صدقيني ياساره كنت بظغط نفسي لايحتمل.
ساره\لاتكملين ياحنين أنسي اللي صار وأحنا عيال اليوم..وأنا مقدره ظروفك..
حنين\يعني سامحتيني..!!
ساره\بسامحك بس على شرط..
حنين\أشرطي قولي اللي تبين أهم شي رضاك..
ساره\أنك ترجعين بيتك..
حنين ابتسمت\اللي الله كاتبه بيصير أنشاء الله..معليش ساره بشوف أمي وش تبي..
ساره\خذي راحتك..
حنين\ها يمه..تبين شي.
أم حنين\يابنتي روحي شوفي أختك..الرجال بيدخل وهي مش راضيه تطلع.
حنين\ليش..!!
أم حنين\تقول بكره زواجي ماله داعي اطلع..
حنين\هههه ياحليلها بروح اشوفها..

العنود\قلت لك ماأبي شفيك أنتي..!!
ريم\عنودوا لاتقهرين أخوي بملكته أستعدلي وطلعي له..
العنود\ماأبي ..ماأبي.. ماأبي..
ريم\حنين شوفي أختك ترى بذبحها..أنا طالعه..
طلعت ريم وتركت الأختين لوحدهم..
ظلت حنين تطالع أختها بحنيه..وكأنها مش مصدقه انها بتتزوج وبتاخذ لافي..
وبعد سكوت..
حنين\والله وكبرتي وصرتي عروس..بس ليش هالتكشيره..ليش ماتبين تطلعين له..
العنود وهي ترتجف\حنين..
حنين\عيون حنين..
العنود\خايفه...ضميني تكفين..
حنين\ولايهمك..تعالي..وحضنتها..
حنين\عنود..بسالك سؤال ..
العنود مغمضه عيونها وماتدري ليه توها تحس بالراحه يوم ضمت اختها
حنين\أنتي تحبين لافي..
العنود\أيه...
حنين\أجل ليش الخوف..أذكري الله ..هذا لافي حب الطفوله والا نسيتي..
العنود\بس..
حنين\أوش..ولاكلمه..وبلا دلع بنات..صدقيني هو متلهف لشوفتك..
العنود وصاحت\زيييييين..
حنين وحبت تخفف توتر أختها\وبعدين وخري عني..بطني ...نسيتي أني حامل
العنود وضاع صوتها بين دموعها\لا..حنين..احبكم..ومش متخيله أني بعيش بدونكم..
حنين\حتى احنا..بس شنسوي..لافي بياخذك..وحلف أربع ايمان..أنا مانشوفك أربع شهور..تعويض عن الأشهر اللي فاتت
العنود وقعدت تحسب\ليش هم شهرين بس اللي ماشافني فيهم..!!؟
حنين\أيه..وضربيه شهرين زياده..
حنين توها تحس باللي قالته..وبعدها على طول أنفجرت من الضحك..
والعنود ظلت تطالع أختها وبعدين ظحكت مثلها..

مرت نص ساعه وبعدها دخلت العنود على الحريم ..وبعدها بشوي دخل لافي مع أبوه وعمر
وبدت الأغاني تاخذ جو الحفله البسيطه..
والعنود مع سوالف ومزح لافي خف توترها شوي..
ويوم شافت الفرحه بعيون الكل نست التوتر واللي جاب التوتر..
أما لافي ..شقولكم عن لافي..يحس روحه أسعد رجل بالعالم..وتمنى هالليله ماتنتهي..
لكن كل مايتذكر انه بكره زواجه يتمنى الزمن يسرع أكثر..وينتهي كل شي على خير..
وبكذه أنقظت الليله حلوه ممزوجه بفرح وسعاده..




يتبع,,,


أحساس

تابع الحلقه الاخيرهـ




اليوم الثاني..
مر اليوم سريع على بيت بو حنين وبيت بو لافي..الكل يجهز عشان الزواج..
صحيح أنه مراح يصير شي..بس عشا عائلي..
لأنه خلوا الحفله الكبيره يوم الملكه..واليوم فقط أجتماع بين العايلتين..
لكن لازم السرعه حتى في الأشياء البسيطه..
وبعد العشاء راح يسافر لافي والعنود لــ لندن عشان يلتحق ببعثته..
زي مايقولون أثنين في واحد..
شهر عسل ودراسه..

مرام\أنتي من صجك..!!
رهف\أيه من صجي..وبعدين شفيها يعني..خليها تتزوج..هي مش كبيره حييل..
مرام\وبسهوله تقولينها...هي من وين عرفته عشان تتزوجه...صدقيني هذا طمعان بثورتها..
رهف\وانتي شاللي حارق رزك..الزواج مو حرام..ريلاكس
مرام\لالالا مش مصدقه..أنا لايمكن أسكت عن هالموضوع..يمه..يبه..وينكم..
يمــــــــــه...
أم زياد\هي أنتي . شفيك تصارخين..
مرام\صج عمتي بتتزوج..!!
.
.
.
سوزان\اأيه بتتزوج..
خالد\ياحليلها عمتي..بدت تفكر بنفسها..
ريان\ومن متى هي تفكر بغير نفسها..
أم فيصل\عيب أنت وياه هذه عمتكم والا نسيتوا..
خالد\ وفيه الظحكه\لا مانسينا..
سوزان\والله ماأتخيل عمتي لابسه الطرحه والفستان الأبييض..وااااي فشله.
خالد\عاد بلاكذب..اللي يشوف عمتي مايعطيها أكثر من ثلاثين سنه..
سوزان\أنت ماتدري عنها ..عمتي تسافر لندن وباربيس عشان تسوي الشد وماأدراك مالشد..!!
خالد\ولو لاتحاولين..عمتي صغيرونه..
ساره\وانتوا شعليكم..صغيره ..كبيره..اتمنوا لها الخير..وبلا كلام فاضي..
خالد\أوه أوه تكلمت ساره....درررر والله درر كلام أختي..
ريان وداش عرض\الا وين فيصل..
سوزان وتناظر ساعتها\تعال الساعه وحده وتشوفه توه داخل البيت..
أم فيصل\ياقلبي عليك ياولدي..تاعب روحه بهالشغل اللي مايخلص..وأبوك مبرد..
خالد\يايمه..هدي أعصابك..هذا مو شي جديد..أيزي..
سوزان وبسخريه\ أي والله أيزي






في الطياره..
لافي بهمس\حبيبتي..
ناظرته العنود
لافي\ فرحانه..!!
ماردت عليه..
لافي\ليش ماتردين..!!
لافي\عنود..عنودتي ..شفيك..!!
العنود\مافيني شي..!!
لافي\طيب ياعمري ليه ماتتكلمين..!!
العنود ونزلت عيونها\بس لافي..
لافي وميت عليها\بس شنوا..!!
العنود\بس لاتقول شي..
لافي\مو بكفيك..!!
العنود\أجل بكفيك..!!
لافي\أيه بكيفي الليله زواجي من البنت اللي ظليت أتمناها من يوم وانا صغير..وماتبين اتكلم..!!
أبتسمت العنود..هي منحرجه
لافي\تدرين..!!
العنود\همم
لافي\لو أحنا مو بالطياره..كان سويت هوايل..!!بس الله ستر..
العنود بخوف\ليه..وش بتسوي..!!
لافي\صايره ملقوفه..بتعرفين بعدين..وبرقه ياحبيبتــــــي..
العنود\لافــــــي..
لافي وهو غرقان بالحب\عيـــــــــــون لافي..
العنود\جـــــب..


رجعنا البيت بعد ماوصلنا لافي والعنود المطار وعلى طول دخلت غرفتي وجلست على السرير لأني أحس بتعب فضيع..
يمكن حركتي هاليومين الكثيره أثرت علي..
غمضت عيوني عشان أرتاح شوي..
لكني فتحتها على صوت تليفوني...
مسكت التليفون ولقيت مسج
فتحته وقريت المكتوب.

لو يموت الشوق بقلوب البشر مايموت بخافقي شوقي عليك..
خذ مسافه يوم..أسبوع..شهر..
وأعرف أني طول عمري مشتريك...بيننا الأيام واحكام الدهر وراح تعرف وش كثر قلبي يبيك

المرسل:فيصل..

وماوعيت الا بمسج ثاني وشكله من فيصل..


أبرسل لك صدى صوتي بعد ماطول سكوتـــــي..أبنثر لك كلام الحــب..واشيل الورد بكفوفي..
واقول آسف على غيابـــــــي..يااغلى حب في حياتي..يطول الوقت أو يقصر..
تراك أنت أغلى أحبــــــابــــــــي..


أحترت..بالأصح أحتار قلبي..
كلامه عذبني..وقريت الحزن بحروفه..
هذه أول مره يتجرا ويرسل مسجات..كان يكلمني ويسأل عن اللي في بطني..ومايتعدى كلامه شي ثاني..
ظليت أفكروافكر وأنا ماسكه التليفون بأيدي..
ظليت افكر بحالي وحالي اهلي...
لين متى بظل معلقه..!!
أخذت أكثر من شهر وأنا في بيت اهلي...
بس كل هذا غصبن عني..
لكن اللي اكتشفته في الأونه الأخيره..
أن فيصل له مكانه بقلبي..وكل مايجيبون طاريه ينعصر قلبي شوق وحزن عليه..
وبين هالتفكير دق تليفوني وكان فيصل..
ترردت أرد عليه والا اطنش..
وضاع الوقت وأنقطع صوت التليفون..
لكنه مامل ودق ثانيه..
وعلى طول رديت عليه..
فيصل\ألوا..
حنين\هلا فيصل..
فيصل\هلا حنين...........شخبارك..!!
حنين\الحمد لله..شخبار الأهل..!!
فيصل\كلهم بخير ويسألون عنك...مبروك للعنود ولافي الله يوفقهم...
حنين\الله يبارك فيك..
وسكتنا...
فيصل\توقعتك تكونين نايمه لأن الوقت متأخر ..ماتوقعت تردين علي...
حنين\لا احنا تونا واصلين من المطار عشان نودع العنود ولافي..وانشغلت..
فيصل\يعني أسكر..!!
حنين\لا...عادي..وانت ..ليش مانمت..!
فيصل بتعب\أنا..أنا توني طالع من الشركه ..أبي أنام بس مش قادر..
حنين\ليه..!!
فيصل\تعباااان..
حنين بخوف\من أيش..!!
فيصل\من كل شي..لاتهتمين..تعودت على التعب..
حنين\طيب فيصل..اخليك ترتاح ..
فيصل وغمض عيونه\طيب واذا قلت لك راحتي معاك بتخليني..!!
مارديت...الصراحه ماعرفت شقول..شكله من التعب قام يقول كلام مش حاس فيه..
فيصل\أوكي حنين ماأبي أظغط عليك..بس حبيت أسال عنك لأني من زمان ماسمعت صوتك..تامرين على شي..!!
حنين\سلامتك..
فيصل\الله يسلمك..
حنين\فيصل..
فيصل\نعم
حنين وبالمووت طلعت هالكلمات\لاتفكر بشي..نام وارتاح واللي الله كاتبه بيصير....
فيصل بابتسامه\يعني أفهم من كلامك أنك.
حنين\فيصل اللي الله كاتبه بيصير.. يالله مع السلامه..
فيصل\ مع السلامه

أول ماسكر فيصل من حنين طلع لغرفة ساره ودق الباب عليها..
ساره وفيها النوم\فيصل...خير عسى ماشر..!!
فيصل بعجله\حنين..حنين ياساره..
ساره\شفيها حنين..!!
فيصل\بكره بروح أخذها واجيبها هنا...
ساره\لسه ماأستوعبت...فيصل شتقول أنت..!!
فيصل\مش مهم تستوعبين...أهم شي أني أنا عارف وش أسوي...يالله تصبحين على خير
ساره\لحظه فيصل...
لكن فيصل تركها ومشى...
ساره\شفيهم اليوم..كلهم مجانين..بروح أنام أحسن

أنكتب يوم ثاني لــ فيصل..
وهو لسه مانام..من الفرحه مش قادر يغمض عيونه..
تروش على السريع وفطر ومر على الشركه يخلص باقي أشغاله..
وأول ماخلص طلع بسيارته على بيت حنين..
دق الباب وردت عليه أم حنين..
وسلم عليها ودخلته المجلس..
وأستأذنت تنادي حنين.....



يتبع,,,,


أحساس

تابع الحلقه الاخيرهـ


.
.
.
حنين\كنت متوقعه..
فيصل وقام\كنتي متوقعه شنوا..!!
حنين\جيتك...كنت متوقعه جيتك..!!
فيصل\وحشتيني..وجيت أسابق الزمن قبل مايسبقني..حنين..
حنين\هلا..
فيصل\اعذريني..
حنين\على أيش..!!
فيصل\على كل شي..خلينا ننسى كل شي ونبدى صفحه جديده..
حنين\.....
فيصل\شرايك..!!
حنين\سمعت نوال شتقول..!!
فيصل\شتقول..!!
حنين\أنا يالغالي رضيت وأكتفيت بكلمتك هذا بس اللي بغيت ودي تحس بغلطتك..
فيصل\يعني..خلاص...رضيتي..!!
حنين\تقدر تقول...
حس فيصل انه مو حنين اللي شافها اخر مره فيه..في دقايق حس أنه في حالم..حلم حلو ومش قادر يطلع منه..
فيصل\حنين ..مش مصدق..واخيرا..
فيصل\تعالي..
حنين\وين..!!
فيصل\تعالي جنبي..
قربت حنين وجلست جنيه..
وبدوا يتكلمون عن اشياء كثيييره..
عن اشياء كثيره عذبت حنين وفيصل.
غربة فيصل وبعده عنهاو شوقه الدايم لها..
وحزن حنين ووضعها الصعب مع اهلها..
وكل واحد كان يعاتب الثاني عتاب بسيط خفيف على القلب والروح..
وكأنهم أول مره يتلاقون ويشوفون بعض..
أول يفتحون قلبهم لبعض بدون حواجز وبدون قيود..
فيصل\شفيك سكتي..!!
حنين\مافيني شي..بس تذكرت أبوي الله يرحمه..
فيصل\الله يرحمه
حنين برجا\فيصل..
فيصل\عيونه..
حنين بدوموعها\طلبتك..لاترديني..
فيصل\أنتي أمري بس..
حنين\أبي أروح مكه...
فيصل بابتسامه\بس هذا طلبك من عيوني اليوم نحجز تذكره وبكره نسافر..
حنين\تدري...
فيصل\شنوا..!!
حنين بصوت حزييين\تدري ماعمري ...ماعمري رحت مكه..
فيصل تفاجأ\صحيح..مارحتي مكه ولامره..!!
حنين\ولامره..كنت دايما احلم أني اوقف قدام الحرم وأصيح لمن أفرغ كل اللي بداخي لكن الله ماكتب..
فيصل مسك أيد حنين\ياعمري ياحنين..خلاص ماأبي دموع..بكره بنروح عشانك.. وابتسم واذا تبين نروح المريخ هم بروح عشانك..بس أنتي أمري...وخلاص كفايه دموع...ماأبي أشوفهم..
حنين\أن شاء الله..ان شاء الله.
فيصل\طيب...يالله متى بنمشي ..!!
حنين\كيفك..
فيصل\روحي جهزي أغراضك وأنا بروح احجز واذا خلصت بمرك أوكي..
حنين\لا صعبه ..أغراضي كثيره وانا ماأستعديت الصراحه..ومايمديني خلها بكره أحسن
فيصل\بس أبيك تجين معي البيت..
حنين\فيصل أنتظرت هالشهور كلها ومش قادر تنتظر يوم..!!
فيصل\أوكي على راحتك...أنت جهزي أغراضك كلها وجهزي اغراض السفر ..يالله أنا بروح اللحين..تبين شي..
حنين\سلامتك...
فيصل وقام\مع السلامه..بكلمك اذا حجزت طيب..
حنين\أنتظرك..








بعد مرور يومين..

العنـــــــــــــود...
العنود\وخر وخر..أصلا أنا ماأحبك...ومشت عنه..
لافي ويركض وراها\كذابه...أصلا انتي تموتين فيني..!!حسبي الله على بليسك ذبحتيني وأنا أراكض وراك..
العنود\أحسن أحسن..أجل انا تتركني ساعتين أنتظرك..
لافي\شسوي حبيبتي الدوام كذه..قولي لي شسوي..
العنود\أمحق شهر عسل ..خلص خلص أنا برجع السعوديه..
لافي مسك العنود وجلسها على كرسي\شنوا..شنوا عيدي اللي قلتيه..
العنود\شنوا...
لافي\عيدي اللي قلتيه...
العنود ببراءه\ماقلت شي..
لافي\أيه أستعدلي أحسن..
العنود\طيب اذا تبيني,,وبصوت عالــــي الحقنــــــــي..
لافي\بالخبله تعالي....العنـــــــــــــود..وركض مره ثانيه وراها..لمن مسكها..
لافي\تدرين...
العنود \نعم..
لافي\شفتي السماء..
العنود\أيه
لافي\شفتي الشمس
العنود\ماشوف شمس..
لافي\أجل شتسوفين..!!
العنود بخوف\لافي...مطر...مطــــــــــــــــــر..
لافي ومسكها عشان ماتشرد\أدري أنه مطر...خليني نمشي بالمطر..
العنود\لالالا لافي خلنا نرجع الشقه..ماجبت مظله..
لافي\وهذا المطلوب...تعالي..ومسكها من كتفها ومشى معها وهم ميتين برد ويظحكون على اشكال بعض وهم يرتجفون..
لافي\أمشي نشتري أيس كريم..
العنود ووقفت\من صجك أنت.!.!
لافي\أيه من صجي...خلينا نحس بالصقيع...
العنود\بدال ماتقول امشي نرجع اخاف عليك تمرضين... تقولي تعالي نشتري أيس كريم..
لافي\والله أنك منتي رومانسيه ياحبيبتي ياماما أنتي..لازم تحسين بعذاب الحب...بكل حالاته...امشي هذا محل أيس كريم..يبيع أيس كريم جنــــــــان
العنود ويأست\لافي..انت مجنـــــــون...







قدام أحلى بقعه في العالم وبقلوب خاشعه وخاضعه
كان في أحلى قلبين..
فيصل وحنين..
وصلوا مكه من يوم وأعتمروا..وهذا هم واقفين يناظرون الحرم بكل نواحيه من نافذة الفندق
وأخير ا تحقق حلم حنين..
فيصل\ماشاء الحرم زحمه حتى لو في الليل..
فيصل\حنين..!!وينك سرحتي..
حنين\هلا فيصل..
فيصل\سمعتي اللي قلته..
حنين\لا..شنوا اللي قلته..
فيصل بابتسامه\ولاشي...
حنين\لا صج فيصل..ايش اللي قلت..
فيصل\مش مهم..ماعلينا..
حنين\أوكي..تصدق أحس أني كل مره أتعب اكثر واكثر..
فيصل\ليه ..في شي..!!
حنين\الحمل تعبني.!!وأحس أني بولد..
فيصل\تبين أوديك الدكتور..
حنين\لافيصل عادي..بس تعب بسيط بسبب الثقل بس..
فيصل\متأكده..
حنين\أيه متأكده لاتشيل هم..يالله انا بقوم أنام..
فيصل\أشيلك..
حنين\لا الله يخليك..أخاف أطيح أنا وياك...
فيصل\لالا تخافين زوجك قدها وعضلات..
حنين\لا فيصل مشكور على خدامتك..
فيصل وقرب منها \مش بكيفك تعالي..
حنين وصرخت \لافيصـــل.لااااا..
لكن لامجيب فيصل شال حنين وانتهى الموضوع..

يتبع ,,,


أحساس

تابع الحلقه الاخيرهـ



:تدري..الكل تخلى عني...

في البدايه أمي وابوي,,
وبعدها ولد عمي اللي حبيته من كل قلبي..
واللحين عمتي اللي كنت أعتبرها مثل امي الثانيه..
مرام\تخيل بتتزوح وتتركني..
أحمد\ولايهمك أنا بريحك وبعوضك بكل شي..واللي باعك بيعيه..
مرام\بس يااحمد انا منهاره,..تعبانه..الكل يفكر أني حقوده..وماأحب الا نفسي..وهومايدرون عني..أنا خلاص تعبت..وبدت تبكي على حالها الميؤس منه ..
هذا حال مرام..من أول ما أنجرحت من فيصل وهي لها علاقه مع احمد اللي تعرفت عليه صدفه وتطورت هالعلاقه ..
لكن كان غرض مرام انها احد يسمعها وتفرغ كل اللي بقلبها لكن خذت طريق الخطأ وتمادت فيه..
كانت تتمنى أنها تنهي هالعلاقه وكل ماتنهيها تطلع لها مصيبه ثانيه و ترجع مره ثانيه تكلم أحمد ..
واللحين تحس نفسها ضايعه بدوامه مالها أخر..
والحزن مسيطر عليها والأهل للأسف مايدرون بهالعلاقه اللي هم السبب فيها..







كنت جالسه مع حنين في التوسعه اللي قبال المسجد..بناء لرغبتها ..
والا لو علي ماجلست لأني أحس بعدم الأرتياح وخصوصا بسبب كثرة الشباب اللي يتمشون..
استغفر الله ماخذين التوسعه كورنيش .. هذا غير الأكل والشرب واللعب والأطفال من جهه ثانيه..
بس شسوي ساكت لأنها أخر ليله لنا في مكه ولازم نرجع الشرقيه عشان نحضر زواج عمتي المصونه..
وبعد هالسرحان شفت ولد صغير شوي مايتعدى عشر سنين جالس يسأل وحنين مدت له فلوس وعلى طول ركض..
وانا هنا تضايقت..
فيصل\لا حنين ليه عطتيه..!!
حنين\وشفيك يافيصل عادي...تبيني أشوفه بهالحال وماعطيه شي..!!
فيصل\انتي ماتعرفينهم ..هذيلا أغنى مني ومنك..ولايغرك أشكالهم.. محد مخرب مكه غيرهم بسبب سرقاتهم..
سمعت حنين كلام فيصل وتذكرت الماضي الأسود اللي عاشته وهي صغيره ..حست أنها نفس حال الولد المسكين اللي مش قادر يسد جوعه بأي شي..هذا غير نظرة الأنكسار اللي بعيونه اللي لو في عذاب بالعالم كله كانت في هالولد الفقير..اللي مش قادر الا انه يسأل...
حنين\تصدق يافيصل..هالولد ذكرني بطفولتي يوم انا صغيره..ذكرني بقسوة الزمن علينا..
تخيـــــل..وأبتسمت بألم
تخيل كانت تمر علينا أيام مانلقى فيها الا خبز وماي..
كنت أذكر أمي توكلنا ماي بخبز..
تخيل نغمس الماي بالخبز وناكله..وبعدها تقول لنا أمي قولوا الحمد لله..ونقولها بكل براءه..
الحمد للله
ويوم كبرت أكثر وصرت اشارك امي بالمسؤليه ..كثرت مسؤلياتنا..
وصرت أشتغل وامي تشتغل .
لكن ماقدرنا نسد كل الثغرات اللي أبوي تركها لنا..ياما مرت علينا ليالي سوده..
عذبتنا..
ذبحتنا
خلتنا نحس بطعم النعمه وحلاوتها..
كنا كل شي نسويه نحسب له ألف حساب..
كان كل شي له ميزانيته..
حتى الماي له ميزانيته..
ماكنا نعرف شي اسمه طلعات وسفرات ..
حتى أهلنا اللي هم أهلك قطعونا يوم دروا بفقرنا..
لكن مع ذلك كنا نعيش مكرمين ولا أحد يقدر ينطق بكلمه شينه عنا..
والله شاهد علينا..
آآه يافيصل ذكرتني بأيام احاول أتناساها..

كان عارف فيصل أنه حنين قويه ..لكنه ماكان يعرف من وين هالقوه استمدتها..
واليوم عرفها..
كانت هالقوه والصمود مزروعه في حنين من يوم وهي صغيره وكل بسبب العيشه الللي حتمت عليها تكون بهالشخصيه القويه..
وأمراءه مثل حنين يفتخر فيها كل رجل عرفها ..
وماندم فيصل على زواجه منها حتى لوكانت بداية زواجهم متأسس على خطأ
بل بالعكس كل يوم يكتشف فيصل جانب مشرف من شخصية حنين ..
وبالأخير عرف أنه وحده مثل حنين لازم تنحط في مكان عالي ومكنون لأنها تستحق كل الخير والراحه الأبديه في حياتها الباقيه..

==================
جاء اليوم الثاني اللي بيرجع فيه فيصل وحنين من مكه

أم فيصل\تأخروا صح..!!
سوزان\يايمه صبري شوي...كلها
دقايق وبتشوفينهم قدام عيونك..
أم فيصل\ساره قلتي للخدم يبخرون الغرفه يوم نظفوها..
ساره\أيه قلت لهم..ورحت تأكدت أنه كل شي تمام..
سوزان\تصدقون شكلي بروح انام...بكره ورانا يوم طويل..
ساره\وفيصل وحنين..
سوزان\يوووه نسيت..امرنا لله بننتظرهم..
حنين وفيصل\السلام عليكم..
ام فيصل\وعليكم السلام..ياهلا والله..
ساره\مابغيتوا تجون تأخرتوا..
فيصل\شنسوي بعد احنا طالعين من بدري لكن طريق المطار ممل..والله ستر لأني مرتين غفتيت لكني القى ضربات محترمه من المدام..
سوزان\زين ياحنين زين سويتي فيه..
حنين\ والله أني ماسكه قلبي خايفه يصير لنا حادث..وهو ولا على باله
ام فيصل\اهم شي انكم رجعتوا سالمين..
فيصل\أي والله...يالله نستأذن..تعبانين ونبي ننام..تصبحون على خير
ام فيصل\وأنتوا من أهله


يتبع,,,,



أحساس

تابع الحلقه الاخيرهـ




اليوم الثاني

حنين\يمه متى بتجين..!!
أم حنين بتعب\مدري والله..يمكن بعد شوي.
حنين\...لا بس ..لاتتأخرين..
ام حنين\أن شاء الله ..مع السلامه
حنين\مع السلامه..
سكرت السماعه من أمي وحطيت راسي على التسريحه..
وهالحركه أربكت فيصل..
فيصل\حنين شفيك..!!
حنين\مافيني شي بس تعبانه شوي..وامي مدري شفيها صوتها مو طبيعي آآه
فيصل\رفعي راسك حنين...
حنين\أحس بدوخه فيصل..
فيصل مسك أيدها\حنين خليني أوديك المستشفى.اليوم منتي بطبيعيه..
حنين ورفعت راسها\لا فيصل بنتاخر على العزيمه..خلاص أنا مافيني شي..
فيصل\حنين لاتقاوميين أمشي أوديك على الأقل أطمن..
حنين بتعب\فيصل خلاص قلت لك مافيني شي..يالله تأخرنا عليهم..
ناظرها فيصل نظرة شك..
حنين\فيصل معليش عطني عباتي..
فيصل\ان شاء الله..
اعطاها فيصل العباه وحاول يساعدها وطلعوا مع بعض لبيت العم بو زياد لأن الحفله بتكون هناك..






رهف\وبعدين يعني خلص أنطموا...
سوزان\أي ننطم الله يخليك..عمتي صارت أضحوكه اليوم..
ترف\واااااااااااي بموووت ضحك..أبي أشوف عريس الغفله زوجها سعود..
رهف\والله أنه عينكم قويه وأنتوا شعليكم بزوجها..
ترف\وأنت شعليك كيفنا نبي نشوفه..
ساره\ترفوا...متأكده تبين تشوفينه..
ترف\أيه متأكده في شي..
ساره\هييييييين ان ماعلمت بعض ماأكون ساره..
ترف\يعني بتخوفيني ..انا ياحبيبتي ماأخاف من احد..
سوزان\متأكده..
ترف\خلوني أفكر شوي..
ساره\المهم لاتنسون اليون بتنامون في بيتنا...!!
ترف\وليه ان شاء الله..
ساره\شف السخيفه نست الأتفاق..
ترف\لا مانسيت بس أحب أستعبط..
ام زياد\أقول ياأم فيصل شفيها مرت ولدك وجها أصفر..!!
أم فيصل\مافيها شي أكيد هذا من تعب الحمل..
أم زياد\أيه..الله يسهل عليها..
ام فيصل\آمييين..حنين
حنين\نعم خالتي
أم فيصل\أمك شفيها ماجت..!!
حنين\مدري والله تقول يمكن تتأخر..
جاء الملاك وبدت أجراءت الملكه
وكلها نص ساعه وصارت العمه زوجه لــ سعود..
وبدى الكل يبارك لها..
البنات\مبروك عمتي..
العمه\الله يبارك فيكم...ويين مرام ماأشوفها؟
سوزان\هذه جات..
مرام\مبروك عمتي..
العمه\الله يبارك فيك..عقبالك يامرام..
مرام بعيون منكسره\الله كريم..
سوزان\مرام...شفيك..!!
مرام \مافيني شي..
وجاء الوقت اللي يدخلون فيه الرجال
والكل دخل مع المعرس..
وأول مادخل المعرس الكل تفاجأ من صغر سنه لأن اللي يشوفه مايعطيه أكثر من 30 سنه..
لكن محد يقدر يتكلم احترام لعمتهم . لبس المعرس العمه الشبكه وبدت الحفله تاخذ مجراها الطبيعي وبالنهايه
اظطر المعرس ياخذ العمه و مابقى شي على موعد
الطياره..

لكن المفاجأه الثانيه اللي صارت قدام الكل أن بو فيصل أعلن خطوبة زياد وسوزان اللي كانت بتصير في يوم من الأيام ومحد أستغرب لأنهم يعرفون بالموضوع من زمان..
والوحيده اللي تفاجأت وماتوقعت هالشي يصير بسرعه اللي هي سوزان
لكن كانت ردة فعلها ابتسامه خجوله والله يعلم وش اللي بداخلها..
رهف\سوزان..مبرووووك..واخيرا بتصير مرت أخوي..
سوزان\الله يبارك فيك
ساره\مبروك سوزان..الف الف مبروك..
سوزان\الله يبارك فيك..بس بنات والله استحي..
ترف\سوزان..شسويتي في أخوي الله يغربل بليسك..والله وسواها زياد..مبروووك
سوزان\الله يبارك فيكم وعقبالكم..وبعدين انا ماسويت شي..هو اللي جاء وخطبني..
ترف\علينا...علينا هالكلام..يمه منكم يالبنات..أنا أعرف حركاتكم عدل..
سوزان\خلاص سكروا الموضوع امشوا نسلم على عمتي قبل ماتمشي..



نواف\أحلى أحلى...الولد يعرف يستحي..
زياد\ياربي نواف ماتوقعت عمي يقول قدام الكل أحس باحراج..
خالد\من صجك أنت قو قلبك ..مو هذا اللي تبيه من زمان..وبعدين تعال لو انا مكانك كان أطير من الفرحه
زياد\ومين قالك أني مش فرحان..بس مدري منحرج شووي.شباب شرايكم نطلع..شكلنا غلط..
خالد\وش الغلط عادي مافي أحد غريب..شفيك انت..!!
زياد\أنا مش وجهي لوح مثلكم..بطلع..سلام..
خالد\شت شت شت..اللحين بنطلع بعده..ياربي منه لازم يخرب على غيره..
نواف\وأنت شفيك ميت على الجلسه..ليكون انت بعد حاط عينك على وحده من البنات..!!
خالد بخوف\أنا..شالكلام اللي تقوله صج أنك ماصخ..
نواف\طيب يالله ورني شطارتك واطلع معي..
خالد بضيق\طيب عادي .يالله نطلع.أصلاأخر همي الجلسه..مالت عليك..
نواف\ههههههههههاي وعليك..
وبعد ماودعتهم العمه..حطوا العشاء وتعشوا
وعلى الساعه وحده رجع كل واحد بيته
رهف\وشفيها يعني اذا ركبنا مع خالد..مالت عليك..!!
سووزان\ترف بلامصاخه الولد ينتظرنا بره..
مرام وفيها النوم\شوفوا قسم بالله ان ماركبنا اللحين لأكنسل كل شي وأروح اخمد بغرفتي..
ترف\لالالا تكفين مرام اذا مارحتي أنا مستحيل أروح..
مرام\خلص أجل انطموا وأمشوا وراي خالد وساره ينتظرونا ..
وبالفعل مشت الأنسه مرام وبعدها الحرس الوطني يتبعها..وأخر الحرس ترف اللي مسويه نفسها مستحيه
البنات\السلام عليكم..
خالد\وعليكم..ماصارت كل هذا تاخير..
سوزان\شنسوي بعد الشيخه ترف مش راضيه تركب..
خالد وتفاجأ\ليه..!!
سوزان\تقول أنهاآآآآآي..تستحي..آآآآآآآي منــــ ــــــك..حسبي الله على بليسك ذبحتيني..
أبتسم خالد وناظر المرايه وماعلق
ساره\سوزان شفيك..!!
سوزان\ولاشي..بس مدري شاللي قرصني..
رهف\يمكن قروص
ساره\وش جيب القراريص بسيارة خالد..وفيها الظحكه..لاياخالد أنت لازم تحط بف بف بسيارتك..تدري حشرات هذه مو أي شي ..!!
سوزان\أيه ايه..لازم تاخذ بف بف للسياره..ترى يمدحونه كثير..آآآه
ترف\بف بف يبخكم وينتف شعوركم ان شاء الله..
خالد وضرب بريك قوي\سمعت صوت والا يتهيأ لي..
مرام\أيه هذا صوت الحشره اللي قرصت ترف..
ساره\خلص عاد..ذبحتوا البنت..سكتوا عنها..
رهف\أيه يوم خلصتي كلامك قمتي تدافعين عنها..
ساره\لا والله
رهف\أي والله
خالد\بسسسسسسسسسسسس
البنات بصوت واحد\يمـــه خرعتنا..
خالد وبعد ماسكتهم\أقول بنات أسكتوا سمعوا هالأغنيه تراكم صدعتوا راسي..

مالي عزا من دونه لــ تيمني هواه
كل الحسن بعيونه في وجهه ومحياه
الناس مايسونه عالي مستواه
قلبي فضى مضمونه وأرجوك لاتنساه
قلبي فضى مضمونه وأرجوك لاتنساه
صون الهواه وبصونه عهد هوى ذكراه
عنكم لو يعدلونه كل العدل خلاه
الناس مايسونه عالي مستواه
قلبي فضى مضمونه وأرجوك لاتنساه..



يتبع ,,,


أحساس

تابع الحلقه الاخيرهـ



خالد\تفضلوا وصلنا...والحمد لله على السلامه..وحياكم الله..توه مانورت السياره وتباركت...
رهف\شكرا شكرا كل هذا لي ولد عمي...
خالد وانحرج\لكم كلكم..حياكم
دخلوا البنات البيت وحصلوه فاضي شكله الكل نام...
جرت مرام سوزان وطلعوا على فوق بدون نقاش..
وبعدها لحقتهم ساره ورهف وترف..
مرام\بسرعه طلعوا لي بيجامه أبي أنام..
سوزان\لاياماما منتي نايمه لمن تقولين لي كل شي..!!
مرام\شنوا..!!
سوزان بصوت واطي\بعدين اقولك..
ساره\طيب وش تبون نشوف اللحين هندي والا اجنبي..
ترف\هندي أكيد هندي
سوزان\لا وع قطع..ماأبي هندي..خلونا أجنبي احسن..
مرام\أيه أجنبي احسن..
ترف\لالا ماأبي أجنبي زهقت منهم..
مرام\خلص اللي تبينه هندي
سوزان\لا والله
مرام \يالخبله عشان تقولين لي السالفه ونتكلم براحتنا..
سوزان\أيه صح..هندي..طيب كل وحده تبدل عشان مايضيع الوقت علينا..
وبعد مابدلوا نزلوا البنات للدور الثاني بالغرفه اللي فيها التليفزيون..
رهف\ طفي اللمبه..
سوزان\ليه..!!
رهف\عشان نعيش جو السينما..
ساره\وهذا ببسي وبوب كورن بعد..
رهف\واااي بيبسي...حبيبتي بنت عمي انتي الوحيده اللي فهمتني..




جالس على السرير وبنتف شعري من القهر...
معقوله ياناس..ترف تحت في بيتنا ومش قادر اشوفها..!!
والله حرام..
شسوي اللحين..!!
أنزل!!
لالالا مايصير شيقولون عني اللحين..!!
أصلا ماعندي سبب أنزل تحت..!!
أووووف شسوي..
خليني أنام أحسن لي..
غمضت عيوني قهر وحاولت أنام..
لفيت يمين..لفيت يسار رفعت البطانيه على وجهي ..حاولت
وحاولت
وحاولت...
بدون فايده..
وقمت على طول..
وانا اصرخ..
عطشـــــان..
عطشـــــــان..
أبي ماااااااااااااي..
بنزل عشان اشرب مااااااااااااي
عليك حركااااااااااات ياخلود..أنت كذه

عدلت شعري ورجعته على ورى وظبطت بيجامتي ورشيت عطري..
عادي أنتوا بس تحمدوا عشان مايصيبكم المرض..
طلعت من الغرفه وقربت جنب الدرج حاولت أسمع صوتهم..لكن ماسمعت شي...
غريبه...معقوله ناموا..!!
لا مستحيل هذيلا خنافس مايصيحون الا بالليل..
أعرف حركاتهم وتجمعات البنات كلها مصخره وضحك..
نزلت من الدرج وماشفت احد بالصاله..وينهم..!!
وأبتسمت..اكيد جالسين يطالعون التلفزيون..
وعلى طول بديت أنفذ الخطه..
رحت للمطبخ وسويت ضجه عشان ابين لهم أنه في أحد تحت..وخذت كاس ماااي وانا اصرخ وأقول عطشاااااااااان
وطلعت بعد ماتأكذت مليون بالميه أنهم حسوا فيني
تحنحنت ودخلت عليهم وشفت حبيبتي تمسح دموعها...ياقلبي شفيها..!!
أبتسمت بغباء وأنا بوجهي علامة استفهام..
خالد\ليش مانمتوا يالشياطين..
سوزان\ماتشوفنا نتابع فيلم هندي.!!
خالد\كل هذا فيلم هندي تدرون كم الساعه اللحين..!!
رهف\ندري ثنتين..
ساره وتبتسم\خالد..تعال تفرج معانا الفيلم رووووووعه..
أبتسمت لخبث أختي ساره والله هي الوحيده اللي فاهمتني الله يخليها لي ان شاء الله
مشيت عند ساره وجلست جنبها يعني تقريبا قبال ترف\مين بطولته الفلم؟؟؟
سوزان\بعيون خضر مدري شسمه حبيب ترف..!!
ترف\أنا مش حبيبة أحد..
سوزان\المهم اللي أذتينا عليه طول اليوم يالله تصبحون على خير فيني النوم يالله مرام..
مرام\تصبحون على خير...
وبعد نص ساعه..
رهف\خلاص ماعدت اشوف أحد تصبحون على خير..
ترف\لا رهف جلسي معي بقى شوي وينتهي..
رهف\مقدر ترف أبي أنام وهالفم طويل..مش راضي يخلص..باي
ترف وشوي بتصيح\لا رهف..
ساره\ ترف..انا معك..ليش خايفه..!
ترف\أنا خايفه مين قال..!!
شفت الخوف بعيون ترف ..
بس أستغربت منها..!!
معقوله تخاف مني..!!
مني أنا..!!
يعني للحين معرفت شكثر أحبها..!!
والله أنها بتجنني..
ساره\وين ترف!!
ترف\بشرب ماي وبجي..!!
ساره\طيب جيبي لي معاك



يتبع,,,


أحساس