ليه خجلانه بعد روح الشعر وايضا الكتابه
ليه تحرجس المشاعر يوم جيتس في جديدي



ليه؟؟ ماقال الشعر لك وش مكانك في جوابه!!
يوم قلتي للمشاعر مابقلبك للقصيدي



خيمت بالقلب ذرات الغرام وفك بابه
واستهاضت لك مشاعر موجها نوعه فريدي



وجيت لك كلي مشاعر شاعرٍ لك في رحابه
كل ماضاقت عليك يكون لك مدٍ مديدي



اسعدي ماللحزن بعيونك النجلا قرابه
بأذن ربي غير تلقين السعاده والمزيدي



لاتقولي كل من حولي تقل شايف سحابه
طالعوني وانت تكتب شعر واحساسي يهيدي



اقري وروحي بصمت وعبري في صمت مابه
قدمهم غير العيون ورمزها بصمتٍ شديدي



وان خجلتي من كتاباتي وشوقي واغترابه
اوقفي في موقفي بالشوق باحساسٍ أكيدي



ثم تلقين العذر لي يوم شوقي من حسابه
جاك مثل الموج يهدر مالتفت لاهل النقيدي





لان مابي من مشاعر صادقٍ مابه غرابه
شاعرٍ باحلى صفاتك هام لو انه بعيدي



والمشاعر يوم ثارت ماخفا اكبر من كتابه
مير للتعبير عما بي اخذي طلعٍ نضيدي