__________________________________________________ _________________
في سيارة راكان

ركب السياره :امانه ابو مشاري شفت احد

ابو مشاري كاتم ضحكته:لا ليه

راكان وكانه حمل وازاح عن صدره:اشووا

ابو مشاري:راكان بقولك شي بس ماتزعل

راكان رجع له الخوف:قول والله مازعل اصلا عارف انك شفت اختي وبنت اخوي وبنت اختي صح خلا ص مو لازم

تقول اصلا هم مفشليني بكل مكان لا تستغرب

فجاءه ابو مشاري انفجر ضحك

راكان عصب:وش يضحكك يمال تضحك بدون ضروس

ابو مشاري:هههههههههههههه

راكان وقف السياره على جنب:بتقول ولا اذبحك هنا

ابو مشاري:ههههههههههههههه

راكان ماسك ابو مشاري من ياقته: ترا ان ماسكت بذبحك فاهم

ابو مشاري يبي يقهره:ههههههههه من اي فلم اكشن متعلمها ههههههههه

وقفت عندهم دوريه :يالاخو وش موقفك هنا

راكان يبعد ابو مشاري:لا خلاص بنمشي الحين

الشرطي:انا شاك انك ارهابي ممكن تتفضل معنا

راكان بستغراب*حلوه شاك اني ارهابي*:لييه الله يحييك وش شايف معي مفجرات ولا وش

الشرطي:لانك كنت بتذبح خوييك

راكان:انت قلتها خويي ليه اذبحه قاعد امزح معه حتى في المزح قوانين

الشرطي:حاس انك قاعد تتطنز

راكان:لاا وش الي اتطنز البركه فيكم الله يخليكم لنا يارب

الشرطي :يالله حركوا بسرعه



راكان مشى وابتعدوا عن الدوريه

ابو مشاري: والله انك نكته هههههههههه راكان والله لا علم امك انك ارهابي

راكان:ساكت

ابو مشاري:ياكشخه ياثقيل والله ماتوقعتها منك تصير ارهابي مع ان فيك براءه مو وجه ارهابي لكن في هالزمن لا

تستغرب اي شي كل شي جايز اسمح لي راكان يالله نزلني انا ماروح مع ارهابيين

راكان :وقف على جنب

ابو مشاري :يالله مع السلامه وارجوا انك تتوب ترا والله الارهاب مو نافعك يقول الارهاب لا وطن لهم ولا دين لهم

ويقول بعد..

قاطعه راكان بهدوء: بتنزل ولا لا

ابو مشاري ضربه مع كتفه بمزح:ياعمي والله شكلك يلوع الكبد وانت متضايق

راكان نزل راسه ولاف يدينه على راسه

ابو مشاري صدق وقال يبي يخوفه قال بسرعه وهو يهزه:راكان راكان الدوريه جات قم

راكان نط وشغل السياره ومشى 200 ولا كلف نفسه يشوف ورا

وابو مشاري خاف شوي لان راكان مسرع راكان بهالحظه لف راسه وراء يحسب الشرطه وراه>>متاثر بالافلام

الكشن
وصدم في عامود كهرب وفقدوا الوعي راكان طار هو من عند الدريشه وطاح على الرصيف وابو مشاري بالسياره هو اكثر من راكان الضربه جات من جهته
جو الاسعاف خذوهم للمستشفى كانت حالة ابو مشاري حاله يرثى لها كله دم ولكن مو زي راكان اهون منه



عند البنات
نواره :بنات قلبي ناغزني حاسه شي صاير
ريماس:اقول لاتفاولين على اهلي بس
نواره سكتت لانها ماتبي تخرب عليهم
نواره:بنات وش تبغون النك
الماسه:حطي اهات بنات
ريماس:لا مو حلو حطي امم حطي معذب قلوب العذارى
نوف:لا نبي شي يجمعنا كلنا
نواره*اف ياربي والله اني خايفه*:وش رايكم نحط بنات زاحفات
وافقوا البنات على النك ودخلواالشات
بعد السلام ومدري ايش
بنات زاحفات:صبااااااحكم فوووول
واحد في الشات:صباحك عدس وقلابه

ريم ميته من الضحك سالناها :وش يضحكك
ريم ماتقدر تتكلم من الضحك:ماالت عليكم...صدق تفشلون
الماسه:وش فيييك
ريم:وش صباحه حنى في الليل كش على وجيكم والله انك محششه يانواره
نوراه كانت هي الي تكتب طاح وجهها
البنات ماتوا من الضحك عليها
نواره وهي تعدل
بنات زاحفات:قصدنا مساء الخير<<سلكوا عاد انتم
وحده:بنات كم عددكم
بنات زاحفات:من 40 ومافوق
واحد:يووه وش هالزحمه
واحد مصري:في مصريه
بنات زاحفات:في جميع الجنسيات طب واختار
دخل واحد(مجبور اعيش بفراقك):من يروح يفطر معي
بنات زاحفات:حنا عادي نروح نفطر معك
مجبور:حياك تعالي
بنات زاحفات:ترا احنا كثيييييييييير
مجبور :حياكم كلكم
بنات زاحفات:بس ترا بنكلف عليك لان احناا كثييييييير
مجبور :عادي فداكم فلوسي
بنات زاحفات:يعني عادي خلك قد كلمتك
مجبور:ليه موب رجال انا اقولكم قد كلمتي وقدود>وحط صورة واحد معصب
بنات زاحفات :طيب لا تعصب الله يخليك ترا حنا رقيقات
مجبور:اموووت انا في الرقيقات
بنات زاحفات:<<لا تصدق
دخل عليهم مجبور بالخاص:تبون فطور تعالو ابالخاص

نواره: ادخل بالخاص ولا لا انا بصراحه مابي
ريماس:خلينا ندخل والله ماكون ريماس اذا ماكرهته بالشات
الماسه :ايه نبي نهبل فيه شوي
نواره قبلت ودخلت الخاص
مجبور:هلا والله
بنات زاحفات:اهليين
مجبور:كيفك
بنات زاحفات:احلف توك سالنا عن حالنا
مجبور:هههههه طيب لا تعصبين وش اسمك؟؟
بنات:اي وحده فيهم تسال
مجبور:كلكم
بنات:يوووه بنجلس لبكره ماخلصت انت وش اسمك؟؟؟
مجبور:فيصل
بنات:عاشت الاسامي
فيصل:عاشت ايامك

المهم تعرفوا عليه الينات لكن ماقالوا عن انفسهم شي كان اذا سالهم انتم من وين يقولون من الارض
واذا لزم قالوا من بيوتنا يعني طفروا به عطاهم رقمه ووين يشتغل وايميله عمره 25
لين قلب الموضوع هوشه لانهم قالوا له يالشايب المنتف وهو انقهر وطلع
والبنات متسدحات ضحك عليه وذلتهم ريماس: شفتوا ماقلت لكم بكرهه بالشات

طفوا الكمبيوتر وراحا عند حلا كان توه بادي فيلم هندي لهرتك روشان
ونوف بغت تجيها الجلطه وجلسوا يتابعون و هم في نص الفيلم اذن الفجرو قاموا صلوا ورجعوا للفلم يكملونه الا نواره والماسه
نواره جالسه في الزاويه وتفكر طبعا لان الماسه تعرف نواره زين وتعرف افكارها
الماسه بصوت واطي:نونو وش تفكرين فيه
نواره*نواره خافت لانها ماتبيها تحس انها خايفه من شي وان ناغزها قلبها صرفت الموضوع* بصوت واطي:بقولك بس امانه انك ماتعلمين احد بيني وبينك
الماسه:والله ماقول لحد
شوي الا مخده صاكتهم هم الثنتين من نوف:انتم ماتعرفون تسكتون
نواره :حشى مركبه رادرات
نوف ماسمعتها لانها رجعت تابع
الماسه بصوت واطي:يلا قولي
نواره بصوت واطي:بجيب قطوتي
الماسه:طيب وشلون تجيبينها مو هي عند الجيران
نواره:ايه عنده.......
قطع كلامها ريموت التي في على جبهتها من نوفوه
نواره معصبه:جعل يدك الكسر وعيونك العمى قولي امين
نوف:اطلعوا برا بتسولفون اطلعوا برا
الماسه:امشي نونو نطلع
طلعوا نواره والماسه من الغرفه((ملاحظه اذا نواره والماسه اجتمعوا على الدنيا السلام))
نواره : ننط عندهم من السور وناخذها اسبوع وهي عندهم
الماسه :خلاص اوكي بس موب الحين
نواره:ايه اكيد اذا قام ابوي لشغله نروح
الماسه:طيب ابوك متى يروح
نواره:يمكن كذا الساعه7
الماسه :ايه زي..
قطع كلامهم سعد اللي توه جاي من المسجد:السلام عليكم
نواره والماسه:وعليكم السلام
نواره راحت حبت راس ابوها
سعد:بارك الله فيك يابنتي امك رجعت تنام ولا قايمه
نواره :لا اتوقع رجعت تنام
سعد:طيب انتم اكيد سهرانين صح
نواره تصرف الموضوع :لا تونا قايمين عشان الصلاه
سعد بشك:والله ماظنيته
نواره :يالله تبي شي انا بروح انام
الماسه راحت عند البنات عشان يسوون انفسهم نايمين
سعد:لا يابوك روحي الله يوفقك وتوه بيروح
نواره:يبه
سعد التفت عليها:سمي تبين شي وانا ابوك شي مضيق خلقك
نواره باحراج:يبه ممكن تدق على جدتي ولا جدي
سعد:ليه يبه وش تبين فيهم على الفجر
نواره:لا بس قلقانه عليهم
سعد*يعني انتي حاسه باللي انا احس به والله يابنتي ماحد طلع علي غيرك*
نواره:يبه وين رحت
سعد انتبه لها:لا معك يابنتي عارف ان قلبك ناغزك وتبين تتطمنين على جدك وجد.......
قطع كلامه جواله اللي يرن هنا نواره تقطعت من الخوف وبدت تنزل دموعها
سعد شافها ولف يدينه على كتوفها
سعد يرد على الجوال:نعم
..........:السلام عليكم معي اخ راكان فهد--------ي
سعد:ايه نعم لييه صاير شي
..........:معك مستشفى ------- اخوك مسوي حادث مع صاحبه ممكن تجي الحين
سعد بخوف لكن مايبي يبين لبنته:ايه خلاص انا جاي الحين
وسكر
نواره بخوف ودموعها تطيح:يبه من اللي يكلمك في ذا الوقت اصلا انا حاسه ان شي صاير والله ان قلبي ناغزني تكفى يبه قولي الله يخليك
سعد انكسر خاطره على بنته وصار يمسح دموعها:لا يابنتي ماصار شي هذا واحد عندي في الشركه يبغاني اجي بسرعه مدري وش صاير بس يابنتي ماعاد ابي اشوف الدموع ابغى بنتي القويه اللي في هالمواقف تكون قويه تواسي اللي حولها ابغى توكنين مثلي انا صح احزن لكن مافي شي يرجع اللي قد مضى عارفه ان ماعندي ولد كبير افهمه لكن انتي حسستيني اني مربي بنت عن عشر رجال اتوكل عليها من بعد الله على اخوانها وخواتها+وصار يناظر ساعته+ يالله يابنتي تاخرت على الشركه لا وصيك يابنتي وباس جبهتها وراح

نواره حست ان ابوه مفتخر فيها واستانست *الله وناسه ابوي مربي وحده عن عشر رجال من بكره بطق الثوب والغتره ومانسى الشاص*>>اللهم لا اعتراض ابوها جالس ساعه يفهمها وهي تقول بطق الثوب والغتره ولا بعد شاص خخخ

رجعت نواره للبنات لقت كل وحده على فراشها:يالخاينات رقدتوا
فجاءه نقزت كل وحده من فراشها ولا كانهم سمعوه
نوف تكلم نفسها :ياربيه الفلم ماشفت نهايته قهرر
ريماس بقهر:ايه والله قهر
حلا :بنات انا قد شفته بايخ ماله داعي
ريم:ماظن فلم لهرتك روشان بايخ والله انا عمري ماشفت ابيخ من بعض الناس
حلا:من تقصدين
ريم:اللي على راسه بطحا
الماسه تكمل:يحسسها
ريم والماسه:ههههههههه
نواره كانت واقفه*زين تطنشوني طيب ان ماخليت كل وحده فيكم تحفر فراشها من الخوف ماكون نواره* فتحت الباب بهدوء وصارت تطل والبنات كانوا متابعينها
فجاءه نواره دخلت بسرعه وسكرت الباب وراها
اللتفت ورا لقت كل وحد منسدحه بفراشها على بالهم ان سعد جاء ولا بعد مغطين ووجيهم بالفراش
نواره:ههههههههههههههه
ريماس تطل مع اللحاف:جاء خالي سعد ولا لا؟؟
حلا قامت:عارفه ان اختي نصابه
الماسه غمزت لنواره نواره فهمت وراحوا غرفة الملابس
وخذوا ملابسهم وطلعوا عشان البنات مايشكون
نواره راحت تلبس(تيشيرت اسود عليه كلمات بالانقلش<مو للبنات للاولاد<وبنطلون ابيض فيه خط اسود على الجنب وضييق شوي ومطلع جسمها خيال ورافعه شعرها بطريقه مهمله ولا بسه ربطه على الشعر بيضاء منقشه باسود وربطه على اليد >مال العرابجه<وساعه رجاليه سبورت سوداء وجزمه سبورت)
الماسه(بلوزه صفراء اكمامها طويله لكن مشمرتها وبنطلون جنز ونفس الحكايه مطلع جسمها روعه>طبعا الماسه ونواره احلى اجسام بالشله حتى البنات يغارون منهم< ورابطه شعرها ذيل حصان وجزمه سيورت وطالع شكلها كيوووت)
نواره:هاه لموسه خلصتي
الماسه تربط خيط جزمتها:يب
نواره:انا بكتب للبنات ورقه عشان اذا اتخرنا يجونا
الماسه :علقيها على الباب

وراحوا وراء البيت ونطت نواره على بيت جيرانهم لكن الماسه وصلت اعلى السور:نواره خايفه وشلون نطيتي
نواره نطت على حديقة بيت الجيران كانت مررره حلوه ولا اهتمت لالماسه وكان باب الكراج قدامها
فجاءه انفتح ودخلت سياره انفنتي سوداء الماسه من الخوف طاحت على الارض
ونواره مبلمه >يعني متنحه
\
\
\
\
\
\
\
\
\
_________________________________________
____________________________________
ابغى توقعاتكم
س1:راكان وابو مشاري وش راح يحصلهم ؟؟؟وهل احد منهم بيموت؟؟
س2:نواره والماسه وش راح يصير لهم؟؟
س3:والبنات بيدرون عنهم ولا لا؟؟؟
الجده والجد وش ارح يصير لهم اذا عرفوا بحادث راكان؟؟
------------------------------------------------------
ابغى الردود عشان اكملها