سكرة فكر ضيعت باقـي عناوينـي
وخلتني أبكي وأردد وين الأصحابي
من يوم حسيـت بالأبـرة تغذينـي
والدمع يجري على الخدين سكابـي
يا قلب يا اللي تعب من فقد غاليني
وشلون أعيد النظر في دفتر حسابي
زرعت له حب في جملة بساتينـي
وعطيته أغلى عهد للحـب بكتابـي
في كل حرف(ن) كتبته تشهد إيديني
والقلب يشهد وأنا مانـي بكذابـي
واليوم يا علة(ن)بالجوف تكوينـي
هذا طبيب الجـروح يزيـد بعتابـي
يقول وشفيـك خفتـي لا تموتينـي
مايدري إني جريح الروح يا أحبابي
سألتني يـا طبيبـي وش يبكينـي
ماني بخايف ولا تدري عن أسبابي
أنا تذكرت من هـو حيـل يغلينـي
وأنا بعد في غيابه قلبـي أنصابـي
لي مدة(ن) غايبة ما شافته عينـي
ولا يحسب إنه يغير حبـه غيابـي
أغليه أنا يـا طبيبـي لا تواسينـي
وخفف يدينك على جرحي توصى بي
جرح الجسد منه يمكن إنك تداويني
وغيره من جروح ماظني لها أطبابي
تكفى ترفـق ولا تجـرح شرايينـي
حيث إن حبه مع الشرايان ينسابـي
أنا جريح الزمن والبعـد يطوينـي
والهجر يرسم مواعيده على بابـي
قفى بي الحـظ والأقـدار ترمينـي
على سواحل غيابه حطـت ركابـي