ماخذينا من ليالينا طرب والا وناسه
.................غــير همٍ بالضــماير بين طيـات المحـــاني

يابعيدين الرموس القلب فيه الهم حاسه
.................ماترك لي ضحكةٍ بين الملا قاصي وداني

كل ماخذ لي شوي بسجتي جات انتكاسه
................ثم عادت بي على ماض الزمان اللي حداني

ول ماقسى وقتنا اللي كل مابغى اسج باسه
.................يرتكي لي بين خلق الله ويرجع لي ثاني

السباع اللي تجوب الارض شبعانه شراسه
.................والاوادم فيه منها ناس به طيب وحناني

والبلا قسوة بشر فيها السعه عكس السياسه
.................لو عطاه الله من اللي ماملك غيره اناني

هذي صنوف الوجيه اللي بعيشتها خساسه
.................مايحب لغيره اللي حب له في هالزماني



والله ان الطيب ماله بالزمن معهم فراسه
...............مير جتهم حظ جعل الله يعوض اللي يعاني

ماصفت للطيبين الا توطتها انتكاسه
.................حالةٍ جعل الولي يلطف بصعبات المثاني

ناس تضحك بالطرب وايامهم كله وناسه
.................وناس ياثقل الليال.. وناس مرتها ثواني

ماعرفنا للوجيه اللي نواجه به عباسه
................ولاعرفنا للوجيه الضاحكه دون اضحكاني

اتعجب من اساليب الزمان وحال ناسه
................شيبت فيه الصغار وحطمت فيه الاماني

كل ماتقول ابتزين تشين وتضيع الرياسه
................وكل ماتقول انتهيت يعود لك حلم الكياني

ثم لا أملت بعض الشي خاب الحلم ساسه
................متـعة التعـذيب للي بين ذاك وبين ذاني

ماعرفنا للمصير ولاقنعنا في مِراسه
................مثل سباحٍ غريق يصارع الموج بهواني

كل ماقرب لشاطي رده الموج بمداسه
................بين جزر ومد ضاع ولانقذه فن اسبحاني

هذي احوالي وحال اللي ازمنه اعلن افلاسه
................عيشـةٍ مره وحالٍ له يهل الدمـع فاني

ماخذينا من ليالينا طرب والا وناسه
.................غــير همٍ بالضــماير بين طيـات المحـــاني