تلعب بي الذكري وانا القلب مشتاق=وشلون أرجع من حياتى زمنها
ومشاعري حبر ٍ على بيض الوراق=ماتت على سطر الألم وأحتضنها
حرف ٍ تعثره في كتابي ولا فاق=ضام الورق والحبر لونه طعنها
في دفتر سنينٍ له الهم سراق=أحيا الجروح اللي قديم ٍ دفنها
في كل صفحه قبر وآهات وأشواق=تحكى عن أيام ٍ حبيبي سكنها
يوم اللقا والقرب وعناق الأحداق=وذاك النسيم اللي يداعب وجنها
والبسمة اللي لأجلها تضحك آفاق=هام السحر فيها وسلم رسنها
في ثغرها الرمان والشهد ينذاق=بين الشفاه وليت عمري ثمنها
شمس الجبين وخدها نوض براق=يغيب نور الكون ويعود منها
والله لايجزاك بالخير يافراق=وشلون أبسلا تالى العمر عنها
كم أفترق لأجلك حبايب وعشاق=وكم من حياةٍ كنت خامة كفنها