واكبدي اللي في زعازيعها سم
وريقي تقل به ركدت حنضليله
مالي جدى الا ونتي والتألم
ومقالب الجنبين تقل بمليله
اضحك واجامل من جلس واتبسم
والقلب همه بالحشا مرتكي له
حدتني ظروفي على شيلة الهم
اشيل حمل ماحد غيري يشيله
يالله ياعالم بمالا بنعلم
ياواحد كل الأمم ترتجي له
عبدك حداه الوقت والليل الاظلم
وضاقت به الحيلات ماتفيد حيله
طالبك تنجيني من الهم والغم
وتروفبي عن ضيقة بي دخيله
مالي جدا الا طلبتك وانت تعلم
بالبينه واللي خفت من حصيله
احاول اسلى لكن الخافي اعظم
والوجه تظهر به خفايا ذليله
هذا الواقع وانا عبد مسلم
وارجيك يامناجي بأمره دخيله
انك تناجيني وبرحماك ترحم
عبدٍ طلب من مايخلي دخيله
يارب لي غالي على القلب منسّم
جسمه نحل ومطاوله فيه ليله
من هول ماصابه كأنه مبلّم
خطوات رجلينه عن امره عزيله
راجيك وانت المرتجى ساعة اللّم
وعند الفراق وعند جمع الحصيله
انك تشافي من شكى ويتبسّم
ياخاف يجرحني بشكواه حيله
حيث الغلا في خافقي ضامّه ضّم
بالثانيه تفكير قلبي يجيله
يارب يامجاوب دعا البكم والصم
هذا الدعا واللي لدي من وسيله
ولانملك الا دعوتك وانت الاعلم
وكلٍ مقصر وانت راع الجزيله