بيانات اضافيه [ + ]

رقم العضوية : 9206  تاريخ التسجيل :  Nov 2010  أخر زيارة : 04-14-2012 (11:03 PM)  المشاركات : 16,089 [ + ]  التقييم :  10  الدولهـ  الجنس ~  MMS ~

لوني المفضل : Black

اول ذكرى عاطفيه

اليوم مادري كأني حاس اني مولع بالذكريات

كلمت احد اصدقاء الدراسه وتذكرنا بعض الاحداث والذكريات وكان العنوان الابرز اننا ضحكنا بهستيريا

قفلت المكالمه وبقي ولع اني اتكلم عن ذكرياتي

عشان كذا بحكي اول قصه عاطفيه بحياتي

باخر سنه من المرحله المتوسطه كان عندنا فريق حواري وعلشان كان معي انا وعبود سيارات كنا نتحكم بالفريق

رغم اني العب حارس مرمى وفاشل اخذت كذا كبري

الا اني كابتن الفريق والمتحكم فيه والبركه مو بشخصيتي القويه ولا بمستواي المبهر بل بسيارتي

طبعا اللي يقرى يقول وين العاطفه يا اخ

اقول له لحضه جايك بالطريق

المهم اتذكر كان عندنا مباراه وطبعا علي انا وعبود تجميع الفريق من بيوتهم واحد من القريبين من بيتنا قالي ليلة المباراه ابو حميد مرني اول واحد علشان اركب قدام وفعلا ماخيبت ظنه مريته اول واحد

وصلت لبيته وكان الباب فاتح طبعا ازعجتهم ( طاط طاط )

بنت الاجواد طلعت تبي تشوف من المزعج ولمحتها بعيني مادري وش صار بس حسيت اني حبيت اخوها اكثر من اول
وطبعا تراعشت الركب واليدين وكل شي

سكرت الباب وانتظرت اخوها لين طلع وانا احس باختلاف بعمري ونفس الوقت بشوية ذنب

المهم لعبنا المباراه وباول المباراه ماكنت مركز وجا في هدف بااااايخ وقتها قالي افضل لاعب بالفريق صحح وانا اعرف انه وده يقول الله يقلع انت وحراستك

المهم من كثر ماكنت افكر فيها وقت المباراه تخيلت انها تتفرج على بالملعب وكانت النتيجه اني لعبت افضل مباراه بحياتي كلها
لدرجة اني صديت ضربة جزاء خخخخ



واول واخر مباراه مدحوني فيها من قلوبهم

طبعا بقي مشهد اللحظه في ذاكرتي وقت طويل حسيت بشي حلو مادري وشو لكن اني كنت امرمر على البيت كثير وصرت امر اخوها كثير واخذه معي ادلعه وامشيه لين زالت هالحاله

بوقتها كان فيه اغنيه شعبيه كنت اشغلها كثير كانت كلماتها تقول :

امر شارعكم واسلم على البيت .. واقول هذا بيت زين الوصوفي << الله من زين الكلمات

وبنهاية السنه اغلب الفريق صار عندهم سيارات واستغنوا عني ولاسوو لي حفل اعتزال ولاشي

وهم لايعرفون الى الان انهم خسروا نجما عاشقا