وجد قلبي وجد من فارق حبِيبَِهْ& ترفتن متمكن بقـلبه غــلاها




حدت ظروف الليالي عن نصيبه& مـايتقارب (مسـتواه ومسـتواها)




هـو يبيها لكن (الفرق) المصـيبه& وهي تبـيه ومجتمعها مـاعطـاها




وابعدوا كلن عن الثاني حبيبه &واحرموا نفســين من غـاية مـنـاها




بنت عز وفي وجاهتها عجيبه &وهـو رجل عــادي و(حــاله) لك عـلاها




واطي وقـته على راسه بغيبه& كل يـوم ظروفه تدور برحــاها




وصار في نارين ولاحدن دريبه & قـل حيـله والفراق اللي طواها




كل مايحاول يصل مسكوا لجيبه& واخرتها حذروه بمحتواها




ثم قـفـا وآنس بقـلبه لهـيـبه & وراح عمره في حـياته مــاهتناها




وهي بعد قامت عليه تشق جيبه & مـارحموا لضـعفها مما وطاها




واستدارت في لياليها العجيبه & واختلف عيش الرغد على حياها




واجهشت في صمت يسمع به نحيبه& في معاليق الخفا ضج بخفاها




كابرت باول بدايتها العريبه & ماتبي لجل اسرته يكشف خفاها




ويوم صار فراقهم واضع نصيبه& فضلت قبر الفراق اللي وطاها




وهو نحل جسمه وبين فيه شيبه & حالته من شافها يرثي مداها




وذا وجودي في فراق له سبيبه & عشقتن ماقدر على نيلت رضاها






روحت ماهو على كيفي مغيبه& ولابكيفه يوم حدوها وراها




ودارت ايام الزمان المستصيبه& واقتنعت بياس آمــالي طـــواها




والسهر هد الجسد في كل هيبه& والمحــاني عــاقها شيٍ وراها




مــابي ابين للبعـاد وللقريبه & واتضـح صــمت المجــاريح وعــنـاهــا




آآآآه ياطـــول الليال المســتعــيبه & وآآآه يامر الليـــال ومـبــتلاهــــــا




كل ماحــاول بنسيان الذهيبه & عادت الذكرى وشبت بي لضاها




وكل ماجي ادله وتصدفني مريبه & اتذكر بالرغد ركضي وراها




وكل مابي انسى معاناتي بطيبه& انجرح بافراح ماتت في صباها




صرت ماعي سكة الدرب القريبه & مثل فقد الذاكره حالي دهاها




ذا الحقيقيه والخفايا اكبر مصيبه & روح هامت ماتحقق مبتغاها




ول ياشــــين الفراق اللي تجــيــبه & هالفوارق بالحــياه بمحــتــواها




حطموا قلبين باحكامٍ غريبه & ووأدوا روح احرمت غاية مناها




وانتهت قصة غرام بكل ريبه & والاماني كفنت في مبتداها


والامل ودع وشاهدنا مغيبه & والحزن خاف المعاليق اكتساها