ألف مبروك التفوق والنجاح=قلتها من قلب وأحساس وشعور
بشروني وطرت لو مالي جناح = علموني وثرت بافراح وسرور
يعلم الله تو قلبي ما استراح =وانقضت ايام أطول من دهور
وصدري الضيق غدى مثل البراح=وكان أضيق صدر من بين الصدور
من قريت اسمك أريج الورد فاح =يابعد كل الروايح والعطور
جيت لك برويك من نبضي قراح =جيت لك بأهديك من شعري زهور
جيت لك بألبسك من فرحي وشاح =جيت لك بقبسك من دنياي نور
ماتحملت انتظر والصبر باح =قلت أمد الشعر للغالي جسور
كان شعري قصّر بحقك سماح=ماعليك قصور من شعري القصور
وكان شعري في سما الإبداع لاح =يكفي إن الملهمة بدر البدور
عاشقك شوقه وسط قلبه رماح =كيف يصبر يا أمل عمري شهور
مركبي وياك ماهزه رياح=بإذن ربي عابرٍ كل البحور
وحبنا ماطاح لو الحظ طاح =الوفا ساسه وصدق الحب سور
ماخذينٍ من غثى الدنيا لقاح=ولا شحنّا من يلف ومن يدور
ومن زرع بالجد واسقاه الكفاح=يجني ثماره لو إن الأرض بور
النحل والورد وأنسام الصباح =والفراشات الجميلة والطيور
كلهم ايباركولك بالنجاح =مادروا إن شاعرك طبعه غيور
جاك قبل الكل يبارك لك وراح =وخلا عندك قلب وإحساس وشعور