قفيت مثل اللي طلع خارج السوق
............يوم اسهمه بالسوق جاها الزوالي
اسحب اخطا رجلي وانا اسوقها سوق
............ثقلت وحارت بس مامن مجالي
وشديتهن يوم الزمن عاقني عوق
............مابه بعد صعبت بسوقي بقا لي
وروحت وجروحي بقلبي لها فتوق
............شيٍ يحير الوصف باللي جرالي
اشيل هم امع الزمن منه محروق
............هـمٍ تـربـع بالضـلـوع النـحـالي
وقعدت اشيل ببدع الالحان طاروق
............وقمت آتوجد ووووه واعزتالي
وجتني تعاتب ليه ياعيد ماتروق
............تحسب زمان اليوم لحظه صفالي
ماجربت لوعات الايام والعوق
............ووقتٍ بلوعاته كوان ووطـالي
تدور بي صلفات الايام وتتوق
............صكات بقعاء بشدها بالرحالي
ولاقلت انا من قسوة الوقت مفلوق
............تقـول صـبرك لـو تطـول الليـالي
هي بنت عز ووضعها ياعرب فوق
............وانا ولـد ناسٍ عـلى قـد حـالي
ماتدري اني كم من ليل مسروق
............يفـوت وعـيـوني سـهرها قزالي
اسعى لرزقي خوف من هرج مطفوق
..............اللي شــــــماتـتهم تهــد الجــــبـالي
واحاول ادله كن مابقلبي فتوق
............ودي امـشـّـي بعـض مما جــــرالي
لكن فضحني موقفي مابه حقوق
............مـع غـيمةٍ فـيها المـطـر مــاهـنـالي
ولالوم وقتٍ ماحصل لي به آروق
............الـوم حــظٍ في حـياتي نعى لي
وهذي هي الدنيا تسوق البشر سوق
............ولاحدٍ خذا ورى نصيبه مجـالي
وكان انت يالايم صفت لك بلا عوق
............انا الشعر عفته سـبب مـابـدالي
هوايتي عنها انحدا كامل الذوق
............مـاعـاد لي رغـبـه بـعـزف الـمـــنــالي
فلاتلومني خلن بلا عزف طاروق
............ولاتعـاتبن لو صـرت بالصـمت بـالي