منتدى دمعـــة ولـــه - عرض مشاركة واحدة

09-04-2014, 06:41 AM

عواد: ( موال )

باعلمكم اذا صك الحلق البطن
لا معلم ولا سفان
يعدل ميلة المايل
انطر نوبة المعلي
وانطر نوبة السنان
من له تروح..مناتسايل
من له تشتكي همك ..
لي همك غدا اوطان
ولي عوقك غدا ديره بلا شيطان

( بو سعد منزوي .. يبكي مفهورا)
طفله: صارت هالديره خطر.. ام الحصى ابلاد خلف بن حسين صارت خطر..ام الحصى
صارت بلا حصا وبيت سعد صار خطر على الامن
جسمان: الله ايعينه على هالاتراك
طفله: ذاك الشيخ اللي يجمع الحصى قبل الفجر ويكومه حول البلاد .. ولين رد من الغوص قال
حق اعياله وجماعته ابنوا هذا الحصى وطين والتبن بيفزع لكم شيخ البدو نسيبي
بوسعد: بس ياطفله ليردون ويسمعونك
طفله: تعال يا خلف ثرا الحصى الي جمعته كله باقوه الكلاب باقوا الحصى وبنوا لهم كوت على سيف البحر..
قلعه اتشوف بيوتنا .. حتى سعد ما لقاله حصى بنا بيته من سعف النخيل بس ما سكنه للحين .. تسمعني يا خلف
بو سعد: الله يهديج يا طفله تعالي يايبه تعالي

جسمان : نصيب !
نصيب: وين عمي بوسعد؟
جسمان: راح .. شفيك وشبلاك؟
نصيب: لا بس انتوا ليش محد مصدقني؟
جسمان: واللي يرحم والديك يا تصيب جوز عن هالسوالف
نصيب: الناس اتقول ان الي ياق البندق من الاتراك السنه الماضيه خلف بن حسين...
والي شب النار في مركبهم خلف بن حسين .. اكيد خلف بن حسين موجود
جسمان: بس .. بس..اسكت
نصيب: بس يا عمي خلني اقولك...
جسمان: (بغضب) نصيب ( يمسك به) اسمع روح الفرضه ولاترد الا عندك خبر
عن اي سفينه يايه من البحرين
نصيب: ان شاء الله .. واذا يايه من مكان غير؟
جسمان: لا بس من البحرين لانه عمك بو سعد يبي يعرف مركب الهند مته بيمر البحرين؟
نصيب: المعالي ولا السنان؟
جسمان: مادري مادري يا نصيب بس روح
لين رحنا البحر قلنا الغوص تعب مته نردالبلاد
هذا اهيه البلاد في البحر اهون لا تلقى هالكلاب اللي ينهشون في الناس...
ولا تشوف دموع طفله ولا حزن بوسعد ...
حيا الله سعاده ... هاتي عنك ( يساعدها في انزال البقشه ) طولتي يا خاله
سعاده: اول نسري مع الذيابه والليل .. نروي الماي من قبل الفجر من اول ما يعوي الذيب لين يصيح الديك...
عمرنا ماعرفنا الخوف .. اما اليوم....
جسمان: وشخبار البلاد؟؟
سعاده: كل يشكي من الجوع .. ايقولون اللولو محد يشتريه وسنين الغوص بتخلص
جسمان: والاتراك؟
سعاده: الاتراك في كل مكان ...
جسمان: والاخير ياخاله؟
سعاده: الشيخ جاسم راح شمالي الديره...
جسمان: وخلا الناس؟
سعاده: لا ما خلاهم كلهم يعرفونه .. كل اهل البلاد يقولون انهم يشوفونه كل ليله
جسمان: شلون؟
سعاده: اختي اتقول بعض الناس ينامون على الجوع ويصحون وعندهم تمر
جسمان: الله سيسض وجهه .. لكن يا خاله والاتراك يدرون؟
سعاده: ايقولون لهم تدبير
جسمان: بس هم مايدرون عنه يا خاله؟
سعاده: يدرون انه راح بيته شمال البلاد
جسمان: بس اذا الناس يعرفونه ويشوفونه اخاف...
سعاده: ( تقاطعه ) لاتخاف يا جسمان مب اهل ام الحصى بس اللي على قلب واحد ...
كلهم اهل في كل مكان الاهل اهل
جسمان: اليوم الاتراك تعرضوا حق طفله
سعاده: شلون؟
جسمان: ايقولون بيت سعد الخالي خطر على الامن
سعاده: ايقولون وايد
جسمان: بوسعد خايف على طفله.. زاد همه هم
عواد : باعلمكم اذا صك الحلق البطان
سعاده: تعال يا عواد .. تعال
جسمان: ونصيب تخبل ياخاله
سعاده: اعوذ بالله نصيب عاقل وشخبله .. تعال..قرب يا عواد تعال( تفتح البقشه وتبحث بداخلها)
جسمان: اقولك تخبل....
سعاده: ( تخرج ثوبآ ابيض بأكمام طويله وتعطيه لعواد المغني)هاك يا عواد ثوب جديد
يايبته بك من البلاد
جسمان: اقول لك تخبل.. تدرين انه يقول انه شاف خلف بن حسين
سعاده: ( تقف بفزع) تخبل.. عمي.. خلف .. بوحسين.. خاوته بنت البحر وخلته يسبح وبعده ماظهر
جسمان: عمي بوسعود مايحب هالسالفه
سعاده:ومن يحب هالسالفه
جسمان: مايحب سالفة بنت البحر ..الجنيه
سعاده: اذا ماخذته جنية من البحر عيل وين راح؟
جسمان: الله اعلم ... بس يا خاله تهقين للحين عايش؟؟
سعادة: حتى لو كان عايش ماظن يتحمل الحياة مع هالاتراك
جسمان: ونصيب يقول ان بن عثمان شقاق المالح اهو خلف بن حسين
سعاده: خلف بن حسين ماله شبيه يا جسمان اللي له حاجه يمر على البيت عقب صلاة العصر خلوني
ارتاح في بيتي شوي ( للماره بساحه ) ( تحمل البقشه وتشاهد عواد وهوه مرتدي الثوب الجديد)
رجل: خوش ثياب الي تجيبينها يا خاله
( سعاده وجسمان ينظران للرجل بستغراب)
عواد: ( موال )
باخبركم اذا حبل الوتر
عاف الحصى والارض
اذاصار الحجي غصه
وصار النور مثل الليل
وصار الخوف مثل الفرض

نهاية الجزء الاول

((وبكره بعون الله اكمل لكم الجزء الثاني
اتمنه ينال ع اعجابكم الجزء الاول
ونفس ماقلت لكم لحد يرد ع الموضوع اله بعد ما كمل باقي الروايه ))

تحياتي
عبدالله ياسر التميمي