جــدك
جتني تعاتبني تقول انت جدك؟!!
............جدك نسـيت اللي تحبك وتغليك؟!!
وتعاتبن وتقول قل ويش ودك؟!!
............والا تبا نسـيان من علقت فيك؟!!
قلت اهدي شويه وابعطيك ردك
...........لحظه وش اللي يالغـلا منفعل فيك؟!!
من قال لك قلب الشقي مايودك؟!!
...........ومن قال لك ثوري براكين وآجيك..؟!!
قالت: انا قلبي ترى اضناه بعدك
...........وثقلك حرق بي غيرتي في مضاميك..!!
اقرب وتقفي كن ماهو بودك.؟!
............مات الغلا والا قفلت الشبابيك..؟!!
قلت السلوم اللي تحدن تحدك
............طبع العرب والدين شجب التهاليك
اقْفِي وانا اقْفِي جعل ربي يمدك
............في طاعته لو ان الاعماق تهويك
قالت:حشا مابي وصال ٍيحدك
............يكفيني عيوني تناظر لعينيك..!
ويكفيني اقرى بالمشاعر مردك
............لاقلت شعر ادعس على السلم وآجيك..!!
قلت: اجل خلي عن عتابي بصدك.!
............اقري بصمت وروْحيِ دون احـاكيك
قلبي لـو ان الود مضـنيه هـدك
............اخــاف شـيطان الوله في محـاريك
وراحت تهمهم في خفا الصمت ...جدك.!!
............وقـلت التكافؤ سـكر الباب لاجيك
واليا اختلف شرطٍ له الدين ردك
...........مانجـبر شروط الزمن لجل ترضيك
وقالت طلبتك بس لاتبيح سدك
............وان بحـت فاسمي لايخطنه يديك
واقفييت واعماقي يصيحن (ودك.!!)
.............وقلبي يهمهم ايه ودي لو الفيك.!!
لكن مثل ماقلت شيٍ يحدك
.............لاصار ضامي كيف تروي مضاميك