الحلقه العشرين
يوسف\خلاص أنا اللي بوديكم..
هيفاء\أمانه عليك يايوسف وين متعب..تكفى قولي..ريحني!!
يوسف\وبعدين يعني !!قلت لك متعب جالس مع ربعه..
هيفاء\أحلف!!
يوسف\هيفاء فكينا ولي يرحم والديك..تراك صدعتي راسي..وأسكتي أمي
جات..ياويلك أن قلتي شي..
أم متعب\يالله ياعيالي تأخرنا على الجماعه..
يوسف\أنشاء الله يمه..
أم متعب\الا تعالوا وين متعب..مش رايح معنا!!!
يوسف \لا يايمه متعب عنده عزيمه اليوم مع ربعه..
أم متعب\طيب يالله سرينا..
ياربي أيش فيني!!كل هذا توتر!!ليه أحس أني أبي أفركش هالزواج وأرجع البيت!!؟
وين اللي متسرع ويبي كل شي جاهز بسرعه!!ليه أحس أني مجرم بحق هالبنت!!!وش
ذنبها هي أنها ماتبيني!!وش ذنبها أنها تدفع ثمن غروري وكبريائي!!وش ذنبها أنه أبوها
أناني ويحب الفلوس!!
ياربي أحس بمشاعر متناقضه!!ياليت الزمن يرجع لورى وأنسى
أن حنين بنت عمي!!
وش فيك يافيصل!!ليش متأثر!!!معقوله أثر فيني كلام أختي ساره
!!!يوم جاتني أمس الغرفه بالليل وتكلمت عن حنين وعذابها المستمر من يوم وهي
صغيره!!ومعقوله أثر فيني شكل بنت عمي مرام!!لحد الان ماأنسى شكلها وهي
تترجاني بعيونها اني ماأتزوج حنين!!ياربي لهدرجه أنا ظالم!!لهدرجه أنا أحب
نفسي!!!أيش فيني !!أحس أني مش فيصل !!!ليه يافيصل!!ليه توك تحس!!ليه تأنيب
الضمير جاء بوقت متأخر!!أيش الفايده اللحين!!يوم طاح الفاس بالراس!!ياربي
ثبتني!!يارب!!
بس لا!!!لايمكن أنسى أن حنين كانت بتردني وبتاخذ اللي مايتسمى متعب!!!أنا
ترفضني!!وعشان ايش !!عشان واحد مدري من وين جاي أسمه متعب!!!لا ياحنين
مش أنا اللي ينرفضّ!!!
بو حنين\فيصل !!!
فيصل\....
بو حنين\فيصل!!
فيصل\ها!!!هلا عمي!!
بوحنين\أيش فيك ياولدي!!
فيصل\لا ..مافيني شي عمي...
أبو فيصل وهو يضحك\تركه عنك ياأخوي أكيد يفكر باللي جاي..
فيصل وهو يتصنع الأبتسامه\أيه والله أفكر...
نزلت من السياره وأنا اركض ركض المهابيل ..اللي يشوفني يقول لاحقني حرامي..
ياويلي ياويلي أكيد اللحين تأخرت عليهم..وأكيد طبعا زفوا حنين!!حسافه فاتني كل
شي!!مالت علي!!أصلا مدري ليش أنا متأخره!!بزعم أنه معدل هالمكياج!!أمحق
مكياج!!أووووف!!وأكيد اللحين العنود بتذبحني!!الله يعيني عليها..
من كثر ماهي تتكلم الخبله ريم أصدمت بشخص طويل وعريض شوي وكانت بطيح
بس الله ستر ومسكها هالشخص!!ونست أن غطاها طايح..
ريم\وعمى أنشاء الله ماتشوف !!أهبل!! خبل!!تمشي وبس!!وأسكتت
لأنها عرفت مين الي صدمت فيه ...وهي الخبله لأن تفكيرها وعقلها مش
معاها..نست أنها تتكلم وتسب اللي صدمها..
عمر\أسف يالغاليه ماشفتك!!!
ريم\عمر!!!
عمر\أيه عمر ..اول مره تشوفيني يعني!!
جلسوا فتره ساكتين ويطالعون بعض!!الكل منصدم بشكل الثاني...عمر كان لابس
ثوب مخصر عليه وغتره بيضه وطالعه له لحيه خفيفه ومبين شكلها كبير وحلو ..أما
ريم كان مبين وجهها وشوي من شعرها وكانت حاطه مكياج وردي جنان..وعيونها
البنيه تلمع..
عمر\ريم!!
ريم\همممم
عمر بصوت يالله ينسمع\أرحميني....أنا ماأقدر على هالشيء..شكلك كذه واشر
عليها.. خذا عقلي وطار فيه...
ريم ياعمري على ريم..اتيببست البنت في مكانها وماقدرت تسوي ولا شيء...ماتت
من الفشيله والكلام الخطير اللي رماه عمر وهو مش حاس بعمره..
حرام عليك ياعمر ذبحتني بكلامك..
يوم أستوعبت أنها لحد اللحين واقفه ..طارت لباب الصاله..ماتبي تشوف عمر وهي
بالحاله هذه..
العنود\وأخيرا ياآنسه تشرفتي وجيتي..وانا ناطرتك من زمان..وموصيتك أنك تجين
بدري..يالسخيفه..الشرها علي أنا اللي أنتظرك...الخ....
ريم وهي حاطه أيدها على فم العنود\أوووش...ولاكلمه..ماأبي أسمع شي....خليني
بحالي..الله يخليك..وراحت عن العنود ودخلت على الحريم...
وبكذه صار الكل موجود..أم متعب جات مع بنتها هيفاء لأن روابي في الرياض
ماتقدر تجي...وأم زياد جات مع بناتها مرام وترف ورهف...وأم فيصل طبعا جايه من
البنات من بعد صلاة العشاء والعمه جايه وماده البوز شبرين لأنها مش وافقه على
الزواج لكنها ماتقدر تسوي شي..لأنها لو سوت شي أنا بوقف ضدها..
وبعض الجيرا ن والأهل جاو يباركون لأم حنين..
طبعا أغلب الموجودين غير راضيين بهالزواج..اللي تشوفونه يبتسم من ورى قلبه وهو
حاقد على الكل أمثال مرام والعمه ..وغيره..واللي تشوفونه يتصنع الأبتسامه مثل
سوزان اللي شايفها نفسها مدري على أيش وهيفاء اللي كانت تتمنى حنين لمتعب
والعنود اللي تبتسم عشان ماتبين لأحد أنها حزينه على أختها ...وأم حنين اللي ضايعه
ماتدري أيش تسوي ..مره تقول خيره هالزواج ومره تقول ياليته ماصار..لكنها
تكابد الدمع اللي في عيونها...أما اللي طايريين من الفرحه أم فيصل وبنتها ساره..مش
مصدقين أن فيصل بيتزوج وبياخذ أحلى وأفضل بنات العايله..فرحت أم فيصل
ماتوصف ..وأخيرا ولدها البكر اللي تحبه وتتمنى رضاه بيتزوج..ومن مين!!من حنين
اللي ياما تمنت أنها تكون زوجه لولدها فيصل..لأنها تحس أنهم يصلحون لبعض..أغلب
الصفات مشتركه بينهم..لكن أكيد بوجهة نظرها أن حنين أحسن بمليون مره من
فيصل من جميع النواحي..عشان كذه هي تتمنى أن حنين تغير ولدها فيصل
للأحسن..ومتأكده ان حنين تقدر على كل شي ..يكفي أنه طول عمرها قضته
لأخونها وأمها بطيب نفس وسعة صدر..اللي يقدر يكون مسؤول عن عايله كامله
ويصرف عليها..اكيد يقدر يغير طبايع شخص واحد..وهي واثقه كل الثقه أن حنين
بتسعد فيصل...بس السؤال اللحين :هل ياترى يقدر فيصل يسعد حنين ويقدر هالكنز
الثمين!!!مع الأيام راح نشوف جواب هالسؤال الصعب...
دخلت ساره غرفة البنات بعد ماأستأذنت من أم حنين وأول ما دخلت ذكرت الله
..مش مصدقه أن هالنعومه كلها والجمال هي حنين..
كانت حنين ماشاء الله عليها جميله من يوم وهي صغيره الشعر أسود وطويل نوعا ما
وبشرتها بيضه مره واحلى شي فيها عيونها لأنها تلمع واللي يشوف هالعيون ينسى كل
شيء ويتأمل فيها..
وكانت لابسه فستان زيتي مموج بألوان البيج الغامق والزيتي والتفاحي والأخضر بس
اللون الغالب الزيتي وكان فيه شك خفيف جدا ..وموديل الفستان شيفونات من تحت
متقطعه على بعض بحركه حلوه وفوق القماش مزموم..<<ماأعرف أفصل كثيير
أعذروني.
وطبعا الفستان مافيه أكمام .وماكانت لابسه شي من الأكسسوارات ماعدا حلق
جاي مع لون الفستان وكبير شوي..وشعرها مفتوح ومبين قصته الطبقات..
ومكياجها سوته لها العنود وكانت حاطه شدوا زيتي بألوان الفستان وروج بيج
بأختصار شكلها روعــــــــــــه...
ساره\ماشاء الله تبارك الرحمن ..بسم عليك من كل عيون حاسده..
حنين وهي مبتسمه\ساره..
قامت حنين عشان تسلم على ساره لكن ساره كانت الأسرع وماخلتها تقوم
وحضنتها بقوه وشوي بتصيح لأنها حاسه بمعاناة حنين لكنها ماتقدر تسوي شي ...
ساره وهي تصيح\حبيتي والله..شخبارك ياحنين وحشتيني مووت!!
حنين وهي تمسح الدموع اللي نزلت\حتى أنا والله وحشتيني مرره..
ساره\شلونك اللحين مرتاحه..!!
حنين وتسوي نفسها عادي لكن عيونها فاضحتها\أيه...الحمد لله..
ساره\الله يسهل عليك انشاء الله ويريحك..
حنين\آمين..يارب..زحمه الصاله!!
ساره\موووت مره كثيير ناس جوا...شكلها امك عازمه الشرقيه كلها..
حنين\هههههههههه لاعاد شدعوه...يمكن لأن الصاله صغيره عشان كذه زحمه..
ساره\الله يخليك ..اي صاله امك فتحت غرفه الحريم ماتكفي الصاله..المهم ماعلينا
يالله تجهزي الحين بيزفونك..
بدى الرعب يختل روح حنين..صح هي تسوي نفسها جامده قدام الكل..لكنها ميته
رهبه من كل شيء..خايفه باللي بيصير اللحين ..واذا دخلت عند الحريم..وخايفه اذا
عاند فيصل ودخل عليها قدام الكل..وش بتسوي ذيك اللحظه..وتخاف أنها ماتمسك
أعصابها وتنفجر قدام الكل...ماتدري أيش تسوي...ماتقدر الا أنها تقول حسبي الله
ونعم الوكيل على من كان السبب..
يتبع...
أحساس