* خالد*
تسولف لي عن الضيقه وانا كلي ألم وأحزان
وأنا من وين ماناظر بعيني شفـت ضيقاتـي
,
تسولف لي عن الضيقه وأنا عنوان للحرمان
دخيلك لا دخيل الجـرح لا تكشـف معاناتـي
,
دخيلك لا تشجعني أسولف وأكـسـر الكتمـان
تعبت من السكوت اللي تعود يسكـن بذاتـي
,
عليم الله مافيني شبر يضحك فرح وأشجـان
وأنا لو جيت ابضحك لك أجيك أضحك بدمعاتي
,
حياتي شعرن وشاعر وجمهوري بقايا انسان
ونقـادي زمـن قاسـي ولا يفهـم كتاباتـي
,
أناظر للبشر حولي أحد يضحك أحـد طربـان
وأنا صعبن علي أضحك أسايرهم بضحكاتـي
,
عجزت أكذب على نفسي بفرحه ما بها ألوان
وحزني ما عجزعنـي بـدا يرسـم نهاياتـي
,
طريقي صعب وجروحي كثير وداخلي ضميان
أبي لو يـوم واحـد أحـاول أجمـع شتاتـي
,
أنا قصه تبعثرت وتطايـرت بزمـن خـوان
تعلمت أخسر البسمه وأداري عضـة شفاتـي
,
أبكتب لك وبالخط العريض وريشـه الفنـان
أنا الخسران توقيعي وانا الخسران بصماتـي
,
أكمل لك عن الضيقه اكمل لك عن الأحـزان
تأكد لو بكمل لك تصيـح وتطلـب سكاتـي
قصيدة قمه بالروعه
قرئتها ترانيم موسيقى
وقافيتها معزوفة مغناة
صح السانك
وتسلم يمينك
وفي انتظار جديدك
أحساس