اختي روان
اول شي ابيك توضحين وش قصدك باللي كان سهل من اول والحين صار صعب ؟؟ لو تجيبينه على سبيل المثال
وبالنسبه لكلامك انه مثل ماتغيرو الناس الزمن تغير !
انا مو معك في النقطه هذي
الزمن هو هو ماتغير الناس هم اللي تغيرو وبتغيرهم تغير مجرى الحياه في الزمان لا الزمان بنفسه
كيف ؟ ووشلون ؟؟
انا اقولك اختي الفاضله
لو تلاحظين اول وليس بالبعيد يمكن قبل 80 او 100 سنه
كيف كانت حياة الناس ؟
كانو مثلنا في مجرى حياتهم الشخصيه
بس طريقة تعايشهم بالحياه كانت صعبه
لقلة الاماكنيات والاعتماد على النفس في كل شي
طلب الرزق
السفر
الزرع
طلب العلم
الصحه والتدواي
كل هذول كانت صعبه جدا جدا جدا
ومن صعبوته الا انهم متعايشين عليها ومتعودين
انا الحين على سبيل المثال
موظف بالمنطقه الشرقيه واهلي وربعي وقبيلتي في اخر نجد جهت الحجاز
بيني وبينهم 1400 كيلو امشي من هنا الصباح بدري ومايحطون الغداء الا انا مشاركهم وجالس بينهم
شوفي اول لو اني عايش معهم ذاك الوقت كان امشي السبع او الثمان ساعات بشهر او شهرين وعلى وسيلة سفر متعبه وشاقه مثل الابل والا الخيل
وهذا مثال بسيط اقوله لك ولا يخفاك طبعا بس ابي ابيّن لك يا اختي ان التغير قام على تغير البشر وبس
الحين زمن التقدم على قولتهم
لا والجاي بعد اهول من كذا
وصدقيني نسولف الحين بالناس اول وكيف كانت حياتهم
وراح يجي بعدنا ناس في اجيال قادمه يرثون على حالنا
وراح يستغربون مثل ماحنا جالسين نستغرب من ظروف عيشة الناس اول
هذا هو الزمن ساعات تمر وايام وسنين وقرون تجري بعلم الرحمن
وهي لاتتغير لكن التغير باللي عايشين فيها يغيرون مجرى الحياه بس مايقدرون يغيرون الحياه نفسها وانا اقصد الزمن
يعني مهما وصلو من علم ماراح يطولون النهار ساعه ولا راح ينقصون من الليل ثانيه
خلاصة الكلام اذا هنالك تغير طرئ فهو في من عاش بالزمان لتغير الامكانيات بسبب التطور والتقدم لكن يبقى الزمن هو الزمن من خلقنا الا ان يبعثون
اسف على الاطاله والموضوع مطروح للنقاش ومفتوح في نفس الوقت
اذا فيه اضافات او اخطاء في طرحي فا الكامل وجه الله سبحانه اتمنى ان تنبهوني لها
اشكرك روان والعذر والسموحه
لك تحياتي