منتدى دمعـــة ولـــه - ₪₪.. نوادر شعر والمعنـى بقـى فـي بطـن شاعرهـا ..₪₪

منتدى دمعـــة ولـــه (https://www.dm3twlh.com/vb/index.php)

- الشعر وعذب الكلام- Poetry Section (https://www.dm3twlh.com/vb/forumdisplay.php?f=7)

₪₪.. نوادر شعر والمعنـى بقـى فـي بطـن شاعرهـا ..₪₪

₪₪₪₪ ::::::: ₪₪₪₪ ::::::: ₪₪₪₪

يسوق الفكر هاجوسه علـى ذكـرى زمـان فـات
.. واسوق الشعر وجـزال القوافـي لاجـل اصخرهـا

هجوس الشاعر ان دارت بفكره جت لها بصمـات
.. وكـــــــل حسـب عقـلـه لــه تفاكـيـر يفكـرهـا

هواجس او تجـارب او حكـم او سمهـا خبـرات
.. نوادر شعر والمعنـى يجـي فـي بطـن شاعرهـا

وانا لو مااصخر صعاب القوافي باجـزل الابيـات
.. حـرام انـي فـلا آقـف ضمـن اشعـار تصخرهـا

ولا آقـف ماقـف مانـي بقـده يفـرح الشمـات
.. ولا ادفع بالقدم خطوة وانـا مـا ادري وش اخرهـا

انا ابويه مربينـي علـى سلـوم وعلـى عـادات
.. مــثـل غيـري مـن عيـال الحمـايـل مانغيـرهـا

وبلشت بناس احرقهـا الحسـد ومقالـب النيـات
.. بـــهـم نــاس بواطنـهـا مخالـفـة ظواهـرهـا

وبهم ناس كما الجرب وبهم نـاس كمـا الحيـات
.. وانـا مانـي بمجـبـور بخـلـق الله اعافـرهـا

اليا برقت بالعالـم يـروح الفكـر منـك اشتـات
.. تشـوف وتسمـع علـوم تعجـز انــك تعبـرهـا

وعرفت ان الرجل يحسد على اصغر واكبر الحاجات
.. ولكـن لا طـرى لـك حاجـة بالصمـت سورهـا

تموت النار ويطيـب المريـض وتجبـر العثـرات
.. ويبـقـى حاسـد النعـمـة ولا يـقـدر يوخـرهـا

يا بوي ابشر بعزك واشمخ براسك على الهامـات
.. حشا الـي مثلـك مـن النـاس ربـي مايخسرهـا

انا لو ما آخذ الا الجود من كفـك وطيـب الـذات
.. ابكسب به عـرب شبـه الجزيـرة عـن اواخرهـا

عرفت ان الرجل يبقى وراه الذكـر لامـن مـات
.. وقـدامـه فعـولـه والجمـاجـم فــي مقابـرهـا

وتجرت بمعرفة عكف الشوارب واهـل الطـولات
.. ولا اخـاوي مـن احـرار الرجـال الا نـوادرهـا

اشوف الصاحب الوافي كما النـادر مـن العمـلات
.. اليا منـه طلبنـي لـو يبـي عينـي لـه اظهرهـا

كريـم يضحـك حجاجـه جـزوم قـرم فالشـدات
.. صـدوق يحفـظ الاسـرار والصحـبـة يقـدرهـا

والا ياكثـر صدقـان الرخـا والمصلحـة بالـذات
.. ولكـن لا بــلاك الله بـهـم حــاول تقـزرهـــا

يقولون الصديـق الصـادق الـي يدمـح الـزلات
.. وانـا اقـول الصديـق ان زل زلــة مايكـررهـا

خطا الغالي يبـي يكبـر بنفسـك مابهـا شكـات
.. ولكـن نقطـة فـي وســط غـبـة ماتعكـرهـا

والى جاتك من الثاني فهي هفـوة مـن الهفـوات
..عليه اصبر تـرى العقيـل تربـح مـن خسايرهـا

واليـا منـك دمحـت الاولـة والثانيـة بسكـات
.. اليا كثرت علـى النفـس العزيـزة وش يصبرهـا

واخوك و ولْـد عمـك لويضـدك بـاره مبـاراة
.. اليـا صغرتهـا تصغـر وتكـبـر لــو تكبـرهـا

قرابتك شجـرة وغصونهـا اليبَـس تبـا مـداراة
.. تلين او تبرض اطراف الغصـون احـذر تكسرهـا

ومـن جـاك يتعـذر لاتـرده واقبـل الصلحـات
.. وان اخطيت اعتـذر والنَـاس لاتجـرح مشاعرهـا

ولا تقول انـي فـلان الفلانـي مااقبـل الغلطـات
.. مـدام الله تعالـى ذنوبـك اليـا تـبـت يغفـرهـا

هواجس او تجـارب او حكـم او سمهـا خبـرات
.. نوادر شعر والمعنـى بقـى فـي بطـن شاعرهـا

للشــــــاعر .. " ضيف الله سعود الحصني " ..

₪₪₪₪ ::::::: ₪₪₪₪ ::::::: ₪₪₪₪

لوحـــــة شعـــــرية ..
تناغمت فيها ..الجزالة .. والقوة .. وروائع الحكمة ..
وزين المراجل .. وتناسقت في جمال بديع .. لتهدي
لنا .. خلاصة دروس .. الفرسان النبلاء .. اهل العلوم الطيبه ..

استوقفتني اللوحة في متصفحي .. واستمتعت بها ..

فأحببت أن تشاركوني روعتها ودمتم بود