منتدى دمعـــة ولـــه - [`~*¤!| جني سليمان |!¤*~`]

السلام عليكم ورحمة الله وبركاته

اطرح بين ايديكم هالقصيده وهي تعبر عن نفسها

وارجو انها تنال اعجابكم

[`~*¤!| جني سليمان |!¤*~`]

ياجني سليمان وين أنـت ذلحيـن .. ليتك تجي وتجاوب الصوت في الحال
أبيك بمهمة قبـل ترمـش العيـن .. وأبشر بما تامر لك الحال والمـال

أبيك تاتي عنـدي بشيخـة الزيـن .. اللي سكنت في القلب والروح والبال
أنشهد إنهـا غاليـة بنـت غاليـن .. لو كان ماهي بنت عـمٍ ولا خـال

وإن كان تبغى أعلمك ساكنة ويـن .. مدري !ولكن بيننا سهـول وجبـال
تـدري بأوصفهـا بليّـا عناويـن .. وبعده بتعرفها من أوصاف وخصال

لكن ليامـن شفتهـا ربـك يعيـن .. بتصيـر اول جنـي يجيلـه هبـال
ولا تشتحن لاصرت ضمن المجانين .. بأحجز لك بأوتيل الإشهـار منـزال

كم شافها من ورع بين الوراعيـن .. وأصبح تقل شايب وله كومة عيـال
من زود هيبتهـا تـذل السلاطيـن .. ومن زود طيبتها تواضع للأطفـال

ومن العقل ترجح بكـل الموازيـن .. ومن الثقل كأنهـا سيـدة أعمـال
ومن الطهر ماحطت عيونها بعيـن .. ومن الستر ملبوسها دايـم إسبـال

في السوق ما تظهر عيونٍ ولا يدين .. أسود فأسود مـا تسحـب وتختـال
أما الوصايف حد علمي من سنيـن .. من قبل لا تلبس لها برقـع وشـال

الطول يحسدها قصـار وطويليـن .. والجسم ياويلي تقل كنـه تفصـال
ومن شاف عينيها سألها تناميـن ..والشعر الأسود منحد كنـه شـلال

ورموشها سهـامٍ تثبـت بقوسيـن .. كم جندلت من فارسٍ كـان خيـال
وخدودهـا يالينهـا يابشـر ليـن .. كنْها سميتها اللـي تنبـاع بريـال

والفم يجمـع ثلجـةٍ بيـن ناريـن ..يخرج منه شهدٍ شفـاء وأمصـال"
وما ودي أتعمق وأنا اخاف شيئيـن .. شرهات غالي او تشمـات عـذال

للحين وانت هناه جنبي وبعديـن ..عجل جعل تاتيـك حمـى وسـلال
يالعنبو غيرك تـرى هدنـي البيـن .. باموت لو طول جفاها بـلا وصـال

لكن تسمع هرجتي زيـن مازيـن .. وأحذر يجي في قلبها منـك جفـال
والله لو جت تشتكي منـك ياشيـن ..لاذوقك تعذيبـي ألـوان وأشكـال

أجل تخوفهـا وأسكـت يامسكيـن .. لا والله إلا الدم لين الركـب سـال
وإن كان فزعاتك جميع الشياطيـن .. ترى الدواسر فزعتي صغار ورجال
وكل القبايـل حضـر ولا بداويـن .. بتفزع مع الأنسي بلا شك وجـدال

ولا يغرك أنك نار وآنا من الطيـن .. آية ويصبح يالغبـي فيـك زلـزال
لكن قبل ما تحترق بأرمش العيـن .. وأرجوك تاتي بمنوة القلب فالحـال

وتقبلو تحياتي

حززين الحرف