دخيلك والزمن تدري سرق من عيني التحنان=ألا وشلون ترضاها وتجرح بالبكى عيني
انا أنسان مع نفسى وأبى أبقى معك أنسان=أشيل الجرح في صدرى ولو نك صرت جافيني
و اذا ودك تكفني شموخ ٍ زاره النسيان=أبى قبرى ثرى صدرك طلبتك لا ترديني
أبى أرقد وسط جوف ٍ رسمته في خيالى كان=وأبى أغفى وأنا حبك وطير الحب يرثيني
أنا والله ماخنتك ولا فكرت بالهجران=ولكن حظى العاثر سطا قيده على يديني
طليب الوقت مايكسب سوى التعتير والخسران=وانا مثله يطالبنى زمانى وطلبه ديني
طلبته لين أعطانى هجير الشمس والحرمان=وأحرق باقى سنين ٍ سرت من قبل توفيني
تعبت أركض ورى طيف ٍ سرابه يلهب الضميان=أموت بلهفتى مدرى أموت وتبكى سنيني
أموت من الغلا لحظه وسابق تالى الازمان=وأشوفك في عيوني كل مالد النظر فيني
أضم بعيني اليسرا دموع ٍ تلهب الوجدان=وأضم بعيني اليمنا خيالك يامخليني
و اذا ودك تكفني شموخ ٍ زاره النسيان=طلبتك في ثرى صدرك أبى قبر ٍ يواريني
وأبى تذكر بأنى لك حظنت الشوق والتحنان=بعيشك والغلا باقى ولو نك كنت ناسيني