http://www.dm3twlh.com/up/files/ums8...rc1nbt84h.jpeg


نضارة وجمال البشرة من أكثر الحاجات اللي بتشغل تفكير كل البنات، وخصوصاً إن البشرة النضرة والصحية بتعكس جمال وحيوية وشباب الوجه، من غير ما نحتاج إننا نستخدم مستحضرات تجميل كثيرة علشان نداري عيوب البشرة..

وخصوصاً إن في الصيف والحر الشديد اللي إحنا فيه، الجسم بيفقد كمية كبيرة من المية، وده بيخلي البشرة بتكون باهتة وشكلها جاف وغير نضرة..

بالإضافة إلى إن كثير مننا بيحصل له اضطراب في مواعيد نومه، وبنلاقي نفسنا بنسهر، وطبعاً الناس اللي بتشتغل بتضطر إنها تصحى من بدري علشان تروح الشغل، وده طبعاً بيزود مشاكل البشرة اللي ممكن نتعرض لها..

ودلوقتي هنعرف إزاي نتجنب مشاكل البشرة من خلال تنظيمنا لعاداتنا اليومية..

النوم فترات كافية.. لبشرة شباب على طول
النوم لفترة كافية من 7 لـ9 ساعات خلال اليوم، بيكون له مفعول كبير في الحفاظ على شباب البشرة، لإن أثناء فترة النوم الجسم بيتخلّص من السموم اللي بتأثر على نضارة وصحة البشرة، بالإضافة إلى أن النوم بيزود من قدرة خلايا الجلد على التجدد، وبالتالي النوم بيحافظ على جمال ونضارة وصحة وشباب البشرة، وكمان بيقلل من فرصة ظهور الهالات السوداء حول العينين.







فيتامين (أ).. لمقاومة جفاف البشرة
فيتامين (أ) من الفيتامينات المهمة والمفيدة جداً للحفاظ على نضارة ونعومة البشرة؛ لإنه بيقاوم إصابتها بالجفاف وبيساعد على تجديد خلايا البشرة، ومن ضمن الأغذية اللي بتحتوي على نسبة كبيرة من فيتامين (أ) الخس والبقدونس والسبانخ والجزر ومنتجات الألبان والكبدة والبيض.

شرب الماء.. للتقليل من انتفاخ العينين
طبعاً كلنا عارفين إن شرب المية والسوائل، حاجة ضرورية للحفاظ على نضارة البشرة، لكن للأسف كثير منا مش بيركز على شرب المية.

وده طبعاً بيسبب مشاكل كثيرة للجسم والبشرة، وبيرفع نسبة الأملاح في الجسم وده بيكون سبب لانتفاخ المنطقة تحت العينين، علشان كده لازم نهتم بشرب المية والعصاير الطبيعية بكميات كبيرة.

الفاكهة الطازجة.. لصحة بشرتك
مفيش شك إن كلنا بنفضّل أكل الحلويات اللذيذة، لكن مش لازم ننسى الفاكهة الطازة لإن لها فوايد كبيرة جداً وبتحافظ على صحة البشرة وعلى تألقها وحيويتها، وبينصح خبراء التغذية دايماً بضرورة الحصول على ثمرتين فاكهة على الأقل يومياً، ومن أكثر الفواكه المفيدة للبشرة هي المشمش والتفاح والفراولة والشمام.