|
لاصار جدك ماترك لـك ملاييـن .... ماهوب لازم تشتري لـه ضحيـه
الشاعر سعود جمعان المطيري من الشعراء المبدعين
وقد حصل له موقف مضحك قبل فترة قصيرة يقول سعود إنه وهو بالمسجد بعد ماسلم الإمام قام شحاذ يشتكي أموره على المصلين لعلهم يساعدونه وهو يتشكى كان مركز بعيونه على سعودجمعان قال له سعود هالأبيات: يا ابن الحلال اللـي تشكـى علينـا حنّا لنا بوضع على الله مشاكيه كانـك تحـرى للعـطـا مــن يديـنـا عزالله إنك عندنا ما أنت لاقيـه ماهو ردى بس أرثع الوقت فينـا ماعندنـا ماناكـلـه دون نعطـيـه .................................................. وزماااااااااااان كان سعود طالع من المسجد ولقى وحدة رافعة يدها وتشحذ عند الباب قال لها سعود: يابنت ياللـي بالمساجـد تطوفيـن كفـي يدينـك قبـل نأخـذ ريالـك حـنــا تـرانــا كـلـنـا مستحـقـيـن ماهو أنتي اللي مستحقة لحالك لو لا الحيا شفتي وزانك ثلاثيـن أحد يميـن منـك وأحـدٍ شمالـك مرفـعـيـن إيديـنـنـا ومتـقـاعـيـن الموجب إن أحوالنا مثل حالـك .................................................. ومرة بعد جا سعود وفتح له حساب وراح بعد كم يوم يبي يشوف كم في رصيده لأنه مرررررررة مطفر وش طلع له على شاشة الصراف ؟ مع إنه متأكد من رقمه السري أنـــا لـقـيـت الـبـنـك مــثــل اخـويـايــه مايقضـي الحاجـة إلــى جــاه محـتـاج أمــس الضـحـى مـريـت كـــل زمـلايــه وكــلٍ عـطـى لــه بالمعـاذيـر منـهـاج وضنـيـت بـاقـي فــي رصـيـدي بـقـايـه وحركـت نـاصٍ حـارس البنـك هجـاج ودقـيـت رقـمـي صـــح مـابــه روايـــه طلع على الشاشة : لا داعي للإزعاج .................................................. وسعود ما عمره دخل البنك لأنه يقول يـا أهـل الوظايـف قـولـوا الحـمـدلله على معوشتكم ولـو رزقهـا ضنـك أنـا وجنـسـي رزقـنـا لــو وصفـنـاه حوذ الحنك مافيه زودٍ عن الحنـك ماطـاح قــرشٍ فــي يديـنـا قرشـنـاه ودايم طفارى الله يجيـرك ويامنـك الـبـنـك لـــولا لـوحـتـه مـاعـرفـنـاه من قل ماندخل على موظف البنـك مـاغـيـر نـقــرا لـوحـتـه ونـتـعــداه وإن قيل هذا البنك قلنا اتركه عنك لاوا هـنــيــك يـالـغـنــاوي هـنــيــاه تـرقـد وحـنــا بـالـدراهـم نـمـونـك نفـرح إلـى مـن المـعـاش استلمـنـاه ويـهــج مـنــا قـرشـنـا ويتـزبـنـك والله يالوتـصـرف ربــع ماصرفـنـاه ليصيبك السكر مع الضغط والتنـك ولـولا جهدنـا وجهدنـا اللـي بذلـنـاه ماتنفـخ ذروبـك وتـمـلأ مخـازنـك مـيـر المـقـدر مالـنـا غـيـر نـرضـاه مرزقك منـا وسقمـة أرقابنـا منـك . ................................................. طبعا والشاعر سعود جمعان المطيري هو صاحب القصيدة اللي يرددون الناس بيتها الأول دايم والقصيدة هي لاصـار جـدك ماتـرك لــك ملايـيـن ماهوب لازم تشتـري لـه ضحيـه قل له ياجـدي جعلـك مـن المناجيـن والله ماتـسـوى قيـمـة البربـريـه عقبتنـي للـديـن ومـصـارع البـيـن ومن زين طبعك كاتبٍ لك وصيه؟ لو أنت ما أخذ لك من الخد حوشين يوم الأراض بـلاش وسـط العليـه إن كـان تلقانـي مـن أهـل الدكاكيـن مطنـطـخٍ هالـحـيـن مـيــة بـمـيـه لـكــن يـاجــدي ضحـيـتـك بـعـديـن إن سهـل المـولـى ثمنـهـا علـيـه حنا بوقتٍ شين وأشين من الشيـن فيـه الخـوي ماعـاد ياثـق خـويـه م ن ق و ل |
حنا بوقتٍ شين وأشين من الشيـن
فيـه الخـوي ماعـاد ياثـق خـويـه تسلم أخوي فيصل على هالنقل الرائع منور المنتدى أتمنى تتقبل مرور إختك ملوكه |
اخوي فيصل
نورت المنتدى يالغلا ولاهنت ولاهان نقلك الرايع وان شالله وعساك من اللي يملكون الملايين اللي ملكوها ماهم اشلى من شاربك ولاهنت |
يعطيك الف عاااافيه فيصل على النقل الراائع بالفعل رااائعه قصه وقصيده تسلم انااملك اخووي والك مني كل الاحترااام والتقدير *** |
اخوي فيصـــل الرياض الله يعطيك العافيه واهلاَ بك انورت المنتدى ونتطلع لكل جديد منك اخي وتقبل تقديري واحترامي |
اخوي فيصل الله يعطيك العافيه ولاهنت يالغلا وننتظر جديدك ودمت بود |
يعطيك الف عافية
قصيدهـ في غاية الروعة سلمت يمناك ياكل الذوق تقبل مروري بنت الغلا |
لاهنت اخوي فيصل على نقل القصيده
وصح لساان راعيهااا والشاعر سعود المطيري من الشعرااء المعروفين والرائعين تقبل احترااااامي |
| الساعة الآن 03:51 PM |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir
HêĽм √ 3.2 OPS BY: ! ωαнαм ! © 2010
استضافه ودعم وتطوير وحمايه من استضافة تعاون