*
ليتك قبل ترحل توادعت وياك
بالماقف اللي مابعده التقينا





الماقف اللي منه قفت بك اخطاك

وبعبرتّك بيّحّت مابالكنينا






شفتك قبل تقفي وبانت خفاياك

والحزن راسم فيك معلم حزينا






عزالله ان الحزن بان بمزاياك

لو كان ماودك يبين الدفينا






يالوعتي اذا اللي وطاني توطاك

ان اشهد ان القلب ميت غبينا






اضحك واجامل بين هذا وهذاك

مابي يشوف اللي خفا العاذلينا







بس الوكاد ان طول الوضع بقِفِاك

ان حالتي يأسا لها الراحمينا







بعدك طواني وانفقد في الادراك

وحالي تردت والعرب شاهدينا







ولياسألوني ياولد قول وش جاك

مالي جدا الا قولتي ياعوينا!





(جميع مابمدونتي من اشعاري)

ياطير بعد البطا حد الغلا يمك
والشوق بعد البطا ياطير صحاني



ياطير قله ترا انا لو ولد عمك
ماشفتني ياخفيف الريش زملاني


مير البلا بوحدتي وهجوسي تضمك
شاعر واعاني مثل ماغيري يعاني

بان الصباح وقربت تشرق الشمس


والليل راح بكل زينه وشينه







ياالله عسى باليوم عن ماضي الامس


مايسعد الخاطر بروحٍ حزينه

جموع الامل طارت بهبت بساط الريح
........................ صريحه مقادير الزمن في خطاويها
تسير بخُطا فيها الثقه مانطحها مزيح
........................ و شموع الامل طفيت بسكة محاريها
ولاهي غريبه لو زماني نسى التلميح
........................ ماتدرا الليال العاقبه في مساريها
مقاسيم دنيا الاقويا به تجي وتطيح
........................ فكيف الضعوف اللي على الله تمدريها
تعبنا نغابش وقتنا والحظوظ تسيح
........................ تذوب الاماني ماتحقـق مرامـيـها
رمتنا ليال الوقت في منفذ التجريح
........................ وعلى الله ميلات الليال وبلاويها
صحيح المقدر ماعنه لو رفضت تبيح
........................ شبوحه خذت روحٍ بنت به هقاويها
ولكن نبي نسعى بكف الفلا ونسيح
........................ وتسوق الليالي قدرة الله باراضيها
سقط بالعريضه روس قوم وقعت وتطيح
........................ ماهو شخص عادي موتته مادِري فيها..!
ومادام العمر باقي به ايام له تلفيح
........................ نبانسوق خطوت وقتنا في رجاويها
ولامنّها فينا استدارت وصارت (ميح)
........................ ماحد يحيي اموات الهشيم بصحاريها
كسر وقتنا كل القيم واصبحت كالريح
........................ هبايب ماغــير اغـبــارها جــا يباريها
وتظل القناعه كنز بس البلا التنزيح
........................ ولاقـفــلت ربــك يـزيــن تــواليـــها

سلام ياللي مابعد لديت من لك كم سنه



ماصار لك ايام لكن بالصراحه ماني بدونك مريح






ياثقل غيباتك على قلب الجريح وماشطنه



وياثقل روحاتك بلا رجعه وقلبك مستريح






من شاف وجهي به قرا حزن الليال المحزنه



على الوعد والصبر طال ومنتظرك اصبح جريح






تعال يامال العوافي رد قلبٍ ترهنه



والا يامال العافيه قل شوف لك غيري فليح






ياكثرهم لو اني ابا ابدلك باهل الحنحنه



لكنك انته غير كل اللي من النوع المليح

يمه تعبت من السفر والترحال
يمه تعبت ولي رجا سامحيني





ماعاد لي قدره على مواصل الحال
تعبت خطا رجلي وتعبت يديني




وجهدٍ بذلته لجل خاطرك لو طال
ماجا ربع جهدٍ بذلتيه فيني




ودي اصل لرضاك في كل الاحوال
لو باتصاله يامنابع حنيني




وغلاك لو له وسط الاعماق مدهال
ابقى مقصّر والرجا تعذريني




يامن حميتيني عن الشمس بظلال
وعن الشتاء باجفانكي تاضعيني




وبالصيف لي فيٍ عن الشمس مقيال
وبكل وقت بضمتك تحضنيني




مااوفيك حقك لاحشا لو لي يقال
مانته مقصر مااقتنعت بيقيني




يامن بشوفك تنزرع كل الآمال
ويروح عني كل ضيقٍ يجيني




وبالقرب منك ارقى على روس الاطلال
واشوف كل الكون قدام عيني




وفي دعوتك احلى الاجابات تنال
الله جعل لرضاك اجرٍ ثميني




عساي انال ابركي خير منزال
يوم الولي في رحمتك يحتميني

قصيدة من ديواني الاول
شمعة امل

سود الليال اللي صفت للمخاليق ***صارت على عيني وقلبي عقوبه





ماذقت فيها نوم ولاتوافيق ***غير السهر بالعين زود اعذوبه





ان جيت ابضحك ضحكة الناشف الريق***اللي عن الما ناشفاتٍ شدوقه





وان جيت ابسلى سلوة اللي من الضيق***كبر المصايب نشفت له عروقه





وحلو الكرى بالعين ماله طواريق***شهور وعيوني لها ماتذوقه





وعلى المخده اركي الجنب وآفيق***متظاهراً كني بنومي رقوقه





ماودي اللي نام بالجنب ويفيق ***ويقول وشبك تقل نومك تسوقه؟!





مابغى يصير بخاطره حر تشويق***لعرف العذاب اللي بقلبي يعوقه





وقلبي على مافيه عهد ومواثيق***وراع العهد ماظن عهده يبوقه





مهما العذاب يطوق القلب تطويق***يخفيه مهما عذبت به حرووووقه

عزوز والله مالنا دون الاقدار
من دون نفسٍ مالها الا جهدها








ولاغير ربٍ خالق الكون ستار

لاصعبت الحاجه وشحت بيدها





وقفه على باب الامل بس الامرار

صعبه الى من سوء بقعا وردها





وايمانا بالله الى صار ماصار

دعوى العباد برحمته معتمدها






واحلامنا صارت مثل لمح الابصار

وآمالنا كم من طبيبٍ وأدها





نضحك ونخفي من عتيات الامرار

وتشح صلفات الليالي بيدها





وباب الامل مهما ابعدت فيه الادوار

غيبه جهلنا الخافيه في أمدها





وربك يهونها وغيبات الاقدار

بأذن الولي ربي ييسر اعقدها





قلته وانا مثلك بدنياي محتار

مثلك بعد يابوي نخاف الادها

الموت ماهو راعي الفقر لامات
......................... الموت راع العز لاضاع عزه
لان الفقـير يعيش من ضمن الاموات
......................... عايش ولكن قاسي الوقت هزه
اما الغني يدفع ثمين الجنـيــهــات
......................... يبـي عــلى عرشٍ بدنيـاه رزه
يدفع يخاف من الكبار المطمات
......................... يخـشى نهــارٍ به عــدوه يخـزه
وروس اتساقط من بعاد المجرات
......................... ونجوم تهوي من مكانٍ منــزه
ناخذ بهم عبره بكل الصعوبات
......................... في واقعٍ فيه اسود الوقت لزّه
واقع أليــم ولكن الحكم ثورات
......................... ولاكل قايد معه شـعبٍ يعزه
ومنهو على عرشه تربع بنزوات
......................... يقع بكرسيه لاجا من يــكـزه
شفنا العبر من حولنا له دلالات
......................... طاحت قمم لو حولها من يرزه
وقصور دكت لو حصونه منيعات
......................... وابــراج دكــت مثل ماادك غـــزه
وعيون به سالت على الخد عبرات
......................... مما رأت من ضيم عصرٍ يحزه
وسعيد من به يتعض قبل مايبات
......................... ذليــل في دنيــاه من بعـــد عــزه
واخذ العبر من قبل ضرب المتاهات
......................... اخــير ممــن ليــن الوقــت رزه
ولابد ماســود الليال الغميـقات
......................... تدور فوق الروس من عقب نزه
والشمس تفرق عن نجوم المجرات
......................... والصقر مامشيه مثل مشي وزه
وراع الالم لوهو سكت فايتٍ فات
......................... اليــوم في وضـع الليـالي تنــزه
قلته ولي في دورة الوقت شوفات
......................... ولاينجبر عظمٍ قسا الكسر حزه